O BNG iniciou a campaña electoral baixo o lema ‘Vigo merece máis’. Así o afirmou o candidato nacionalista á Alcaldía, Xabier P. Igrexas, que asegurou que encaran con “entusiasmo e optimismo” tendendo a man a toda a veciñanza para empurrar o seu proxecto “aberto e en positivo para levar a cidade máis alá”.
Igrexas valorou que a cita do 28 de maio é “unha grande oportunidade” para que a veciñanza de Vigo defina un “novo rumbo e horizonte” para a cidade. “Durante os vindeiros días haberá quen se encargue de que repetir que o resultado das eleccións está escrito, pero estamos convencidas e convencidos de que o escenario está moito máis aberto do que algúns queren facernos crer”, destacou.
O cabeza de lista asegurou que os vigueses van poder escoller entre “quen só pode ofrecer máis do mesmo” ou apostar pola alternativa do BNG para “abrir un tempo novo” na cidade. Chamou nese sentido a “construír entre todas e todos” un Vigo máis habitábel e moito máis verde, socialmente xusto e igualitario, que volva ser o pulmón industrial e produtivo de Galiza, vangarda na creación cultural e que exerza o papel que lle corresponde como maior cidade galega, como motor de todo un país.
O cabeza de lista realizou tamén unha valoración do barómetro publicado polo CIS que, ao seu xuízo, confirma a “tendencia” de anteriores enquisas que sitúan o BNG como a “forza á alza” en Vigo. “O apoio cara a nosa alternativa en positivo non deixa de medrar e temos a certeza de que imos ser a grande sorpresa o 28 de maio”, augurou.
