A Xunta aprobou o proxecto de orzamentos da comunidade autónoma para 2024 que ascende a 13.257 millóns de euros -un 5 % máis que este ano e a mesma cifra na que fixou o teito de gasto- que incluirán máis de 5.000 millóns de euros para a sanidade pública “por primeira vez na historia” e sen “recorrer ao endebedamento por primeira vez en 16 anos”, segundo destacou o presidente da Xunta, Alfonso Rueda, na comparecencia de prensa tras o Consello da Xunta.
“Son unhas contas prudentes e realistas”, dixo Rueda, e subliñou que “Galicia é unha das primeiras comunidades en aprobar os seus orzamentos para 2024 e, un ano máis, facémolo en tempo e forma. O Goberno galego segue a súa folla de ruta de estabilidade, por iso aprobou uns orzamentos que medran un 5% e que teñen como prioridade o crecemento estable, a creaciónde emprego, o reforzo dos servizos públicos, o apoio a familias e empresas e o impulso decidido de proxectos transformadores”.
O conselleiro de Facenda, Miguel Corgos, que acompañou a Rueda na comparecencia diante dos medios, reiterou que se trata dunhas contas “prudentes e realistas”, a pesar de que faltan os datos que debería facilitar o Goberno sobre entregas do sistema de financiamento e obxectivos de déficit, e lembrou a previsión macroeconómica para o ano que vén: un incremento do PIB do 1,9 % e unha taxa de paro do 9,4 %.
Nestes orzamentos, que mañá serán entregados ao Parlamento para iniciar a súa tramitación, a Xunta deixou a porta aberta a utilizar a marxe de déficit que estableza o Goberno central.
Gasto social récord
Tal e como destacou Rueda as contas de 2024 reforzan o gasto social tradicional (sanidade, educación e políticas sociais) e o gasto para o fomento do emprego. Así, inclúen o maior gasto social da historia que ascende a 9.774 millóns de euros (1.234 millóns máis que hai tres anos) para sanidade, ensino, políticas sociais e emprego. “Por vez primeira destinaranse máis de 5.000 millóns de euros á sanidade pública”, informou o presidente. Pola súa banda, Corgos engadiu que “tanto o ensino coma as políticas sociais terán máis recursos que nunca” con 2.858 millóns ao ensino público, 1.303 a políticas sociais. E hai que engadir 448 millóns para o emprego”.
Política fiscal
Os orzamentos do ano que vén consolidarán todas as rebaixas fiscais postas en marcha ata o momento, sinala a Xunta, que leva aprobadas catro rebaixas do tramo autonómico do IRPF desde o ano 2014. Galicia xa é a comunidade con mellor tratamento fiscal no Imposto de Sucesións, pois o 99,9% das herdanzas de un familiar directo non tributan. En canto ao Imposto de Transmisións Patrimoniais (ITP), o vindeiro ano rebáixase un punto o tipo xeral para a compra de inmobles usados (pasa do 9% ao 8%). Como novidade, na declaración do IRPF do ano 2024 as familias con dous fillos xa poderán deducir 250 euros, dedución que até agora tiñan as familias numerosas e que se duplicará.
No apartado de investimento produtivo disporá 2.838 millóns de euros, un 2,4% máis que no 2023. Se se ten en conta o esforzo investidor acumulado nesta lexislatura, nos últimos catro anos a cifra supera os 10.500 millóns de euros, advertíu a Xunta. Segundo o conselleiro, mantéñense “altas cotas de investimento” a pesar de que a comunidade non disporá dos recursos extraordinarios para a recuperación tras a pandemia da covid que houbo os últimos anos.
En cando aos gastos correntes, o capítulo un, de gastos de persoal, increméntase nun 6% até os 4.867 millóns de euros, polas subidas de salario para todos os empregados públicos e por “un esforzo adicional en novos recursos humanos, en especial no ámbito da sanidade pública”, explicou Corgos.
Os gastos financeiros increméntanse un 70,4 %, até os 188 millóns de euros, polo aumento dos tipos de interese, aínda que Corgos indicou que nesta lexislatura Galicia aforrará no pago de intereses uns 500 millóns de euros.
