Auga polos regatos, polos ríos e polos camiños. A choiva aumentou o caudal dos cursos fluviais do monte Aloia e, como é habitual, converteu algún camiño en rego, pero tamén foi notable a enchente atlética congregada no monte pese as condicións meteorolóxicas. Ata 506 deportistas remataron o trail do monte tudense que tivo unha paisaxe espectacular: verde, húmida e con lameiro. Puro monte galego.
Na distancia curta, a vitoria foi para Anxo Otero nun podio moi ordeado. Medio minuto despois chegou Diego Pons e sobre un minuto cedeu José Antonio Burgos. En mulleres, Ángeles Domínguez superou en dous minutos a Rocío Rodríguez e Daniela Carvalho pechou o caixón.
A cita longa, de 20 quilómetros e un desnivel forte no que o lameiro incrementou a dureza, gañouna David Porto, que meteu dous minutos a Daniel Domínguez, mentres que José Alberto Lorenzo finalizou terceiro. En mulleres, a viguesa Noemí Álvarez superou á veciña da localidade tudense Aida Valiño, mentres que Bryony Izzard completou ó podio.
