Os Concertos do Xacobeo poñen a banda sonora do verán

Hai tempo que Galicia deixou de ser unicamente un destino de natureza, gastronomía e patrimonio para converterse tamén nun referente da música en directo. Boa parte desta transformación leva o selo dos Concertos do Xacobeo, o programa impulsado pola Xunta de Galicia que este 2026 reúne máis de 180 festivais, ciclos e concertos, repartidos por 75 localidades galegas, coa participación de máis de 800 artistas ao longo de doce meses de programación.

Dentro dese mapa musical, a provincia de Pontevedra ocupa un lugar protagonista. Vigo, como principal área urbana de Galicia, e o conxunto das Rías Baixas, acollen algunhas das propostas máis destacadas dun calendario que combina grandes festivais internacionais, concertos multitudinarios, ciclos especializados e iniciativas culturais singulares que converten a música nun auténtico motor económico e turístico.

A programación comezou xa nos primeiros meses do ano con propostas como Lingua Urbana, Wake Up! (ambos no Ifevi) ou o primeiro concerto do ciclo Intermodal, con mariagrep & Mundo Prestigio no Mondo Club a pasada primavera, confirmando a capacidade de Vigo para atraer públicos de diferentes estilos e xeracións. Coa chegada do verán, a actividade intensifícase e a provincia convértese nun dos grandes epicentros musicais da comunidade.

O Galicia Fest, celebrado no Porto de Vigo a pasada fin de semana, abriu un calendario estival de música en vivo no que tamén destacan os dous concertos de Leiva, un dos artistas máis recoñecidos do panorama estatal, no Porto da cidade os vindeiros 3 e 4 de xullo. Poucos días despois, do 9 ao 11 de xullo, PortAmérica volverá reunir en Portas a miles de asistentes nun festival consolidado como un dos grandes referentes nacionais grazas á súa combinación de música, gastronomía e promoción do territorio. A cita exemplifica á perfección a filosofía dos Concertos do Xacobeo da Xunta de Galicia: grandes eventos capaces de atraer visitantes, dinamizar a economía local e proxectar internacionalmente a imaxe de Galicia. No seu cartel destacan nomes como Rigoberta Bandini, Fillas de Cassandra, The Rapants, M-Clan, Xoel López ou Dani Martín.

Tamén a cidade de Pontevedra reforza o seu protagonismo coa celebración de Bigsound Pontevedra os días 17 e 18 de xullo, con estrelas tan actuais como María Becerra, Nathy Peluso, Ana Mena ou Natalia Lacunza, mentres que o Atlantic Fest, do 17 ao 19 de xullo en Vilagarcía de Arousa, continuará a súa consolidación como unha das grandes referencias do indie nacional, da man de propostas como Franz Ferdinand, Two Door Cinema Club ou Carolina Durante, entre moitísimas outras.

A programación esténdese ademais por boa parte da provincia con festivais como SonRías Baixas, en Bueu; Son do Mar, en Cambados; Petra Rosa Festival, no Porriño; Festa da Rosa, en Mos; ou a intensa programación do Náutico de San Vicente, no Grove, convertendo practicamente toda a xeografía pontevedresa nun escenario musical durante os meses centrais do ano.

Especial protagonismo merece tamén Costa Feira, en Sanxenxo, que este agosto suma unha ampla programación con actuacións de artistas como Juan Magán, Nicky Jam, Loquillo, Rusowsky, Delaossa ou diferentes propostas temáticas, consolidando unha das ofertas musicais máis ambiciosas do verán galego.

Máis aló do verán e por todo o territorio

Os Concertos do Xacobeo non rematan co verán. O calendario continúa durante o outono con eventos como Underfest Xacobeo, convertido xa nun dos festivais urbanos de referencia, que en outono achegará a Vigo á banda de culto Hoodoo Gurus, ademais de novas citas musicais que prolongan a actividade cultural e turística máis alá da tempada alta. Este modelo de programación distribuída ao longo de todo o ano responde a unha estratexia clara da Xunta de Galicia: utilizar a música como ferramenta para diversificar a oferta turística, favorecer a desestacionalización e levar actividade económica a diferentes comarcas.

O impacto destes eventos vai moito máis alá dos propios recintos de concertos. A chegada de milleiros de asistentes tradúcese nun incremento da ocupación hoteleira, da actividade hostaleira, do comercio, dos transportes e dos servizos turísticos. Grandes festivais como PortAmérica ou Sinsal levan anos demostrando a súa capacidade para atraer visitantes doutras comunidades autónomas e tamén do estranxeiro, xerando un importante retorno económico para o territorio. Ao mesmo tempo, os Concertos do Xacobeo reforzan o tecido cultural galego ao ofrecer espazos de visibilidade para artistas internacionais, nacionais e tamén galegos, consolidando Galicia como un dos grandes destinos europeos para a música en directo.

En 2026, máis de 800 bandas e artistas pasarán polos escenarios do programa. Nomes internacionais e estatais de primeiro nivel conviven cunha forte presenza de talento galego, configurando unha oferta plural que abrangue todos os estilos e públicos. Na provincia de Pontevedra, esta aposta tradúcese nun calendario con máis de 40 eventos repartidos por unha decena de concellos, unha programación que sitúa Vigo e as Rías Baixas como un dos principais motores culturais de Galicia e confirma que a música é tamén unha ferramenta para crear riqueza, atraer turismo e proxectar a imaxe dunha comunidade moderna, dinámica e aberta ao mundo.

Aposta decidida da Xunta

Ademais desta aposta polo turismo de festivais, desde a Xunta de Galicia estase a investir decididamente para garantir unha oferta plural, de calidade e sostible, que reflicta a variedade de paisaxes, patrimonio e experiencias do destino.

Experiencias como as celebracións declaradas de interese turístico: 28 destas festas na provincia de Pontevedra que recibiron axudas de Turismo de Galicia específicas para a súa organización e difusión.

Outra proposta singular da provincia pasa pola súa oferta en enogastroturismo, modalidade que está a captar cada vez máis visitantes. Esta tendencia beneficiouse de subvencións para actuacións de adecuación deste tipo de establecementos, outorgadas a 19 negocios, así como a proxectos tractores da enogastronomía de Galicia, que chegaron a sete establecementos.

Desde Turismo de Galicia contribuíuse a impulsar outra das modalidades senlleiras de Galicia, o termalismo, a través das axudas para a reforma ou rehabilitación de hoteis balneario e talaso, que chegaron a varios establecementos da provincia.

Un destino turístico atractivo e sostible

No marco do compromiso do Goberno galego para consolidar un destino de calidade, a Xunta tamén facilitou que 66 empresas rehabilitasen parte das súas infraestruturas mediante as axudas para actuacións de embelecemento do litoral galego, e 52 negocios puideron realizar reformas para mellorar a súa eficiencia enerxética.

A través destas accións, a Xunta axuda a conformar un destino atractivo, capaz de absorber a demanda turística de forma sostible, garantindo o benestar tanto de visitantes como da poboación local. Unha rede na que as citas da programación dos Concertos do Xacobeo son a escusa perfecta para deixarse atrapar.

Esta estratexia está a dar resultado. Ata maio de 2026, fixéronse 901.623 pernoctacións na provincia de Pontevedra, o que marca un incremento do 1,5% respecto ao mesmo período de 2025, o que avala a estratexia do Goberno galego que aposta pola desestacionalización.

En total, 520.423 visitantes fixeron noite na provincia nos cinco primeiros meses do ano, dos que case o 40% era de fóra de España -un 3,5% máis que no mesmo período de 2025-.