Atlántico

BAIXO MIÑO

Oia fai historia co primeiro crowdfunding arqueolóxico

A campaña recibe un apoio masivo de doantes galegos e de países como Estados Unidos e Reino Unido

Xosé Gago, de Costa dos Castros, con Lisa Westcott, de  DigVentures, no castro de Chavella.
Xosé Gago, de Costa dos Castros, con Lisa Westcott, de DigVentures, no castro de Chavella.
Oia fai historia co primeiro crowdfunding arqueolóxico

As catro comunidades de montes do concello de Oia querían facer dos seus espazos, coñecidos pola súa riqueza natural e arqueolóxica, un novo atractivo turístico que permitise a conservación deste patrimonio, e para iso lanzaron en xuño unha campaña para recadar fondos para financiar o seu proxecto Costa dos Castros. Fíxose a través do sistema de crowdfunding: un xeito de micromecenado realizado a través de internet (páxina web e redes sociais) que permitiu recibir aportacións de particulares. Agora, acaban de facer historia con esta primeira campaña de crowdfunding arqueolóxico, á que se sumaron finalmente 90 colaboradores de distintos países, até reunir un total de 10.523 euros.
“Lanzámonos á aventura. Nunca se fixera nada así en Galicia e non sabiamos como resultaría. Tiñamos a seguridade de que por pouco que lográsemos recadar, axudaría ao proxecto, pero acadar o cen por cento é un auténtico fito” apuntou o coordinador de Costa dos Castros, Xosé Gago, a través dun comunicado.
As últimas horas do sábado 30 de outubro, o día de peche da campaña de crowdfunding, foron moi activas nos dispositivos dos membros da Costa dos Castros. “Estabamos a un 98 por cento e queriamos chegar ao cen por cento. Comezamos a chamar, mandar mensaxes e a movelo nas redes sociais. Ao final conseguímolo”, engade Gago.

castros e petróglifos
O obxectivo era acadar 10.000 euros para levar a cabo proxectos arqueolóxicos en Oia, concretamente no castro de Chavella e no petróglifo de Auga dos Cebros, así como a creación dun arboredo en Mougás.
Amais do financiamento, a campaña de micromecenado tiña tamén unha intención de marketing. Realizouse coa axuda da empresa británica DigVentures que xa levara a cabo con éxito campañas semellantes no Reino Unido. A través dela o proxecto galego chegou a fogares de todo o mundo. Na campaña de Chavella participou in situ xente de Estados Unidos, Escocia e Inglaterra, pero a comunidade virtual creada ao redor de Costa dos Castros chega xa a moitos máis países. n