Xulia Alonso, Galega Destacada por plasmar os anos da droga

Na década de 1980 a moita xente nova en Galicia a súa adolescencia e mocidade lles sorprendeu en pleno auxe da heroína e da sida. Sobrevivinte daquela época é Xulia Alonso (A Rúa, 1961), autora do libro “Futuro Imperfecto” (Galaxia, 2010), que acaba de ver a luz en edición en castelán con prólogo da directora de cine Carla Simón. Esta escritora é a nova galardoada co premio Galega Destacada, que dende hai 35 anos entrega por estas datas o colectivo Diálogos 90, coincidindo co aniversario do pasamento da pensadora e xurista Concepción Areal.

Xulia Alonso recoñeceu que o libro non foi escrito para ser publicado, senón para “consumo familiar”, e por iso agradeceu ao seu editor, Víctor F. Freixanes, e á comunidade educativa por faceren posible a difusión de “Futuro Imperfecto” entre a rapazada, hoxe allea a aquel fenómeno da droga. “O libro só me trouxo alegrías e me axudou a vivir”, confesou. Tamén, neste senso, se acordou da sanidade pública na súa loita contra o VIH e a sida. Finalmente, dedicou o premio de Galega Destacada a todas as mulleres da súa vida, especialmente á súa filla Lucía, á súa neta Rosa e a súa nai, recentemente falecida.

O galardón, como xa é tradicional dende hai uns anos, entregouse nun acto celebrado no Pazo de Castrelos, con presencia do alcalde, Abel Caballero, de todas as concelleiras do goberno municipal e das autoridades militares da cidade. Previamente, houbo unha ofrenda floral no Cemiterio de Pereiró perante o monumento funerario a Concepción Arenal.

Xa en Castrelos, a presidenta de Diálogos 90, Marita Vázquez de la Cruz, nun divertido alegato ao que xa ten afeitos aos asistentes a este acto, fixo un pequeno apuntamento sobre a penalista ferrolana, da que aproveitando a ausencia, este ano, do seu tataraneto, Federico Cantero, chanceou co feito de que era “un pouco túzara”. Sobre Xulia Alonso, destacou o seu poder de “interpelar” á sociedade.

Diálogos 90 é un colectivo que naceu como un foro de mulleres de tendencia feminista. Onte, o alcalde, Abel Caballero, fixo un chamamento para a continuidade desta iniciativa. Tamén avogou pola presencia da muller en todos os ámbitos, como é o caso da astrofísica Ana Ulla, presente onte en Castrelos, ou da enxeñeira Carmen Misa, do CERN.

Tamén tivo palabras para a nova Galega Destacada e, tras lembrar a Carmen Avendaño, impulsora de Érguete, asegurou que “os que estean presos da droga, que saiban que hai esperanza”.