Un “xigante” da cultura galega: “Adeus, camarada”

A noticia do falecemento de Xesús Alonso Montero inundou de mensaxes nas redes sociais en recordo do académico vigués. Moitas asociacións renderon unha sentida homenaxe a un grande impulsor da cultura galega. A Real Academia Galega recordou o legado que deixou nos seus catro anos na presidencia. "Levou a nave en tempos moi difíciles. Permanecerá a súa pegada imborrable non só pola súa visión innovadora da literatura e da lingua, tamén polo seu maxisterio, que deixou innumerables discípulos”, recordou o actual presidente, Henrique Monteagudo.

“Adeus, camarada”, rezaba unha mensaxe do Partido Comunista de Galicia. A Asemblea Republicana de Vigo catalogouno como “militante de todas as nobres causas”. A Asociación Galega de Editoras tamén lamentou, “con profundo pesar”, o falecemento de quen foi Premio Honorífico Follas Novas en 2022, outorgado pola propia asociación. A Fundación ourensana Curros Enríquez recordou a figura: “Da súa achega son infinitas as pegadas que quedarán para sempre impresas na historia de Galicia e na súa literatura”. Outra fundación, Otero Pedrayo, amosaba a tristeza por perder a un dos seus: “Con toda a pena e o corazón encollido. Que a terra sexa leve”. A Editorial Galaxia, con sede en Vigo, mostrou o seu pesar e reivindicou o seu legado “como parte da nosa tradición intelectual. Deixa unha obra imprescindible para comprender a historia cultural e política de Galicia". O Consello da Cultura Galega, do cal era membro, recordou o seu “exemplo cívico e político, sendo “unha figura central da lingua e da cultura galega na segunda metade do século XX. Mestre de mestres”.

De Abel Caballero a Elena Candia. Políticos de Galicia e tamén de talla nacional recordaron a figura de Alonso Montero. O secretario de Estado de Juventud e Infancia, o vigués Rubén Pérez, salientou que era “un día triste” pola morte de un home que “tivo un compromiso militante coas causas xustas da humanidade”. Antonio Maíllo, actual Coordinador Federal de Izquierda Unida, resaltou a súa agudeza na análise cando coñeceu a Alonso Montero nunha visita a Vigo: “Se nos va un gigante de la cultura gallega y un comunista cabal. Honor y gloria”, publicou na rede social X.

O presidente da Xunta, Alfonso Rueda, asegurou que quedará para sempre a súa obra, aínda que a cultura “perde uns dos pensadores máis relevantes de Galicia”. O alcalde, Abel Caballero, asegurou que Alonso Montero “permanecerá para sempre na memoria da cidade de Vigo” pola súa sabedoría e “ser unha figura transcendente para a historia de Galicia”. Unha mensaxe máis persoal foi a da tenente de alcalde, Carmela Silva, quen coñeceu o finado sendo estudante de Maxisterio en Vigo: “Sorprendeume a súa intensa cultura, a súa capacidade dialéctica, a súa inmensa intelixencia. Vaise un sabio, unha persoa inesquecible”. Outros políticos coma as alcaldesas de A Coruña e Lugo, Inés Rey e Elena Candia, recordaron a un dos bos e xenerosos de Galicia.