O galeguismo vigués chora o pasamento de Quico Domínguez

O ano rematou de loito para o galeguismo vigués co pasamento de Francisco Domínguez Martínez (Ribeira, 1944/ Vigo, 2024). Galeguista dende a mocidade, substituíu a Francisco Fernández del Riego ao fronte da Fundación Penzol en 2010 ata 2021, na que retirou da dirección, pero continuou a ser padroeiro. “Sentimos unha fonda dor na Fundación polo seu falecemento”. Así daban a nova en redes sociais, asegurando que fixo da causa galega “una das súas razóns de ser”. Amais de refundar o Partido Galeguista e ser o seu secretario de 1978 a 1982, foi presidente da Editorial SEPT e un dos impulsores da Biblia en galego, así como accionista e conselleiro de Galaxia. “Pola súa coherencia vital e a fidelidade aos seus principios éticos, foi un exemplo a seguir para todos nós”, afirman dende a Penzol.

O presidente da Real Academia Galega, Víctor F. Freixanes foi dos primeiros en reaccionar, comentando que se van os mellores: “Perdemos unha gran persoa e un galego de lei”. Tras louvar a súa lealdade e xenerosidade, deulle as grazas por todo. O crítico literario e escritor, Ramón Nicolás asegurou que o botará de menos: “Estimábao moito e respectábao intelectual e humanamente, xeneroso e íntegro, cordial e sempre próximo”. Cándido Pérez Betanzos, do movemento veciñal, destacou o sue compromiso “coa lingua, o país e as persoas”.

A docente e escritora Malores Villanueva, compañeira na Fundación Penzol, recoñece que “aínda que o desenlace era agardado, non por iso atenúa a dor”. Na súa homenaxe en redes lembrou o seu último acto público, hai dous anos, na presentación da biografía de Villanueva sobre Don Paco: “Púidena redactar grazas, en boa parte, aos seus apuntamentos e á súa prodixiosa memoria”. Apunta que foron 20 anos de amizade. “Era un home de fe, bondadoso, dirixiu Cáritas, pero no precisaba cargos para facer o ben. Hoxe non quixo flores, eses cartos preferiu que os destinasen a un donativo. Quico segue a dar exemplo ata o final”.

O 31 tivo lugar o velorio no tanatorio de Pereiró, onde os seus restos foron incinerados onte a seguir dun oficio relixioso. Mañá, ás 20 horas, terá lugar o funeral na parroquia do Sagrado Corazón, igrexa da rúa Rosalía de Castro.