Fornada de novidades literarias polas Letras de Begoña Caamaño

As Letras Galegas 2026 traen consigo unha ampla fornada de novidades literarias arredor de Begoña Caamaño, autora viguesa homenaxeada este ano. As editoriais aproveitan a ocasión para reeditar títulos centrais da súa obra, publicar novas creacións inspiradas na súa figura e adaptar o seu legado á nenas e nenos, con obras que van dende literatura a ilustración e, tamén, propostas escénicas.

Editorial Galaxia aposta pola recuperación das dúas obras publicadas de Caamaño, como “Circe ou o pracer do azul” e “Morgana en Esmelle”, novelas nas que Caamaño devolve voz a personaxes femininas silenciadas. A estas súmanse títulos que profundan na súa vida e compromiso cultural, como “Biografía de Begoña Caamaño”, de Ana Romaní e María Xesús Nogueira, e “Begoña Caamaño. Xornalismo para a cidadanía”, de María Xosé Porteiro. Para o público escolar, Galaxia presenta “Bego e o mundo do revés”, de Iria Collazo López, que achega aos lectores máis novos á infancia da autora, e o espectáculo musical “Chaves invisibles”, adaptado por Vero Rilo con música de Luís Iglesias, pensado para Educación Primaria.

Editorial Xerais suma á celebración dúas propostas centradas na rapazada. “Os fíos de Begoña”, de Eva Mejuto con ilustracións de Nuria Díaz, é un álbum ilustrado que percorre a vida de Caamaño desde a infancia ata o seu papel clave na radio, a literatura e o activismo. “Begoña ou o pracer da amizade”, de Beatriz Maceda, é unha biografía novelada na que catro voces míticas –Circe, Penélope, Morgana e Xenebra– contan a vida da autora, resaltando amizade, memoria e igualdade.

Con esta fornada de publicacións, Galaxia e Xerais convidan a lectores de todas as idades a mergullarse na súa obra.