A USC cre que a cota catalá reduciría os recursos galegos

O conselleiro de Facenda, Miguel Corgos, informou onte de que remitiron xa un informe independente de facenda da Universidade de Santiago de Compostela (USC) que concorda co afirmado da Xunta de Galicia sobre o financiamento singular: que aplicar un convenio con Cataluña “implicaría unha diminución” do sistema galego. Así o explicou o conselleiro na Toxa (Pontevedra). O citado informe, apuntou, é o primeiro informe académico que se presenta após os acordos entre ERC e o Goberno para investir a Salvador Illa como presidente catalán a cambio de cesións por parte do Goberno central.

A “diminución” que apunta o informe, apuntou Corgos, é algo menor que a defendida pola Administración galega: 634 millóns de euros fronte aos 638 d ela Xunta. “Substancialmente, coincide”, destacou. A segunda conclusión, continuou, é que “se se extrapola ese sistema a todas as comunidades, a perda podería alcanzar máis de 2.000 millóns ou 2.100 millóns”.

Ademais, remarcou que se Galicia adoptase ese sistema de concerto, “obtería tamén unha diminución dos recursos porque só contaría cos seus recursos tributarios deses 2.100 millóns de euros”.

“Por tanto, á vista destes datos -que subliñou que chegan de parte de profesores de Facenda Pública “independentes”-, non se entende moi ben que haxa aínda algún grupo político que defenda en Galicia, a aplicación dun sistema de concerto ou financiamento singular”, asegurou.

Suficiencia financeira

Así as cousas, Corgos defendeu que debería camiñarse cara a un novo sistema que “achegue máis recursos, que profunde na suficiencia dos financiamentos das comunidades e que tamén mellore a repartición para garantir unha repartición equitativa entre as comunidades autónomas e cubrindo as necesidades e as diferenzas de custos que ten cada rexión”.

No caso de Galicia, recoñeceu, existe un sobrecusto “importante” polo envellecemento da poboación e pola súa dispersión, que supón un custo maior á hora de prestar servizos públicos autonómicos. Sobre isto, pide tamén que se acheguen máis recursos porque, sinala, a diferenza entre o financiamento global das comunidades e a recadación tributaria global “tamén é cada vez maior”.

“É preciso equilibrar eses servizos porque as políticas públicas autonómicas como sanidade, educación e política social crecen a un ritmo máis elevado que o resto de políticas públicas”, incidiu. Nesta liña, insistiu na necesidade de revisar o sistema de forma que os recursos se repartan “en termos de equidade e coas mesmas regras de xogo para todo o mundo”.

Esta mesma semana, o informe O impacto económico para Galicia da extensión dos sistemas de concerto, presentado polo Foro Económico de Galicia calculaba que a comunidade galega podería perder ata 634 millóns de euros nun escenario de concerto para Cataluña no que esa comunidade non faga achega solidaria ningunha ao sistema. A cifra aproximábase á calculada pola Xunta de Galicia.