O 80% dos bolseiros BEME elixen consolidar o seu talento en Galicia

As Bolsas de Excelencia Mocidade Exterior (BEME) non son só unha axuda académica, senón a porta de entrada á posibilidade dun futuro laboral e vital en Galicia para centos de licenciados galegos do exterior. Así o confirmou o secretario xeral da Emigración, Antonio Rodríguez Miranda, durante un encontro mantido en Ourense cun grupo de beneficiarios desta convocatoria, no que lembrou a recente publicación no DOG da décima edición deste programa. Con esta nova convocatoria, a Xunta acadará a cifra histórica de 2.000 mozos retornados desde a posta en marcha desta iniciativa.

De feito, para o vindeiro curso 2026-2027, o Goberno galego destina 2,55 millóns de euros cos que conceder 250 novas bolsas. Estas axudas, que oscilan entre 8.000 e 12.500 euros, están deseñadas para cubrir os gastos de matrícula, viaxe, aloxamento e manutención de mozos galegos residentes no estranxeiro que queiran cursar un mestrado nalgunha das tres universidades públicas da comunidade. “Falamos dun programa plenamente consolidado”, suliñou Miranda durante o encontro celebrado en Ourense, “que funciona e ofrece oportunidades reais para que a xente nova formada no exterior poida desenvolver o seu proxecto de vida en Galicia”.

Bolsas con historia

Detrás desas cifras están as historias dos mozos e mozas con orixes galegas que chegan á comunidade para consolidar a súa formación académica ó tempo que conectan coas súas raíces familiares. A efectividade destas bolsas reflíctese en historias como a de Víctor Delgado, un enxeñeiro civil chegado de Río de Janeiro que coñeceu este programa “por Instagram”. Despois de mudarse a Galicia coa súa nai, cualifica o Máster Universitario en Desafíos das Cidades da Universidade de Vigo no Campus de Ourense como “espectacular”. Para el, a contía da bolsa é fundamental, ó tratarse dunha axuda que nos permite cubrir todos os gastos, desde a alimentación ao transporte.

O sentimento é similar para ó de Yanina, que deixou atrás a súa carreira como avogada en Arxentina para especializarse en Economía Circular na Universidade de Vigo. “Decidín ampliar os meus coñecementos e o acompañamento da Xunta foi constante, algo clave nun cambio de vida tan importante”, explica. Janina, que ten raíces en Friol (Lugo), destaca a calidade docente e xa proxecta o seu futuro aquí, coa idea de “se podo armar unha vida en Galicia”. No seu caso é a primeira vez en Galicia, a onde sempre “quixen vir coñecer á miña familia”.

Pola súa banda, o arquitecto cubano Emilio Martínez chegou a Ourense grazas ao aviso da súa avoa da man dos colectivos de galegos de Cuba. Actualmente reside en Allariz co seu tío, “que xa leva 20 anos aquí”, e cursa un mestrado sobre Urbanismo con vocación internacional. “Fixen o proceso, colléronme e aquí estou. Encantaríame quedarme aquí e exercer o que estudei”, que é Arquitectura, confesa Emilio, poñendo voz ao obxectivo final do programa: que o talento retornado bote raíces permanentes.

Coa oferta de máis de 95 mestrados, as bolsas BEME seguen a ser a ferramenta estratéxica da Xunta para atraer capital humano e facer fronte ao reto demográfico, transformando o mapa académico e profesional galego.

Nova convocatoria aberta ata o 30 de abril

A idade media das persoas bolseiras nas edicións anteriores sitúase arredor dos 29 anos, o que reflicte que se trata maioritariamente de perfís con formación previa e experiencia profesional. “Moitos deles xa están a traballar ou a desenvolver iniciativas emprendedoras, polo que para Galicia é unha enorme riqueza poder incorporar este talento altamente cualificado ao noso tecido social e económico”, indicou Miranda.

No encontro celebrado en Ourense, os estudantes compartiron as súas experiencias académicas e persoais, coincidindo en destacar o papel clave das BEME para facilitar o seu retorno e a súa integración en Galicia. Todos eles proceden de países como Arxentina, Venezuela, Brasil, Uruguai ou Cuba e cursan mestrados vinculados a ámbitos estratéxicos como a nutrición, a economía circular, a xestión deportiva, o turismo ou os desafíos das cidades.

Ademais, o secretario xeral da Emigración aproveitou para lembrar que o prazo de presentación de solicitudes para a nova convocatoria das BEME xa está aberto e rematará o 30 de abril. “Galicia volve abrirse un ano máis á súa mocidade no exterior para ofrecerlle formación, oportunidades e futuro. As BEME son unha porta de entrada real para volver”, afirmou.

Este programa, integrado na Estratexia Galicia Retorna 2023-2026, permitiu mobilizar xa máis de 15 millóns de euros de investimento público e consolidouse como unha ferramenta clave para a captación de talento internacional de orixe galega. Arredor dun 80% das persoas beneficiarias permanecen en Galicia ao rematar os seus estudos, incorporándose ao mercado laboral por conta allea ou emprendendo.