Máis de 1.300 estudantes viven a Noite galega das persoas investigadoras

De xeito presencial ou virtual. En sesións de mañá ou de tarde. En grupos de pouco máis dunha decena ou que superan os 60 participantes. Desde o 2 de xuño máis de 1300 estudantes de 17 centros de primaria, secundaria, FP e bacharelato das provincias de Pontevedra e de Ourense están a participar nas preto de 60 actividades programadas para darlles a coñecer a Noite galega das persoas investigadoras (www.gnigth.gal), que terá lugar, coordinada pola Universidade de Vigo e coa colaboración dunha decena de institucións galegas, o vindeiro 24 de setembro. Dezaoito investigadoras e investigadores responsables e outros cinco colaboradores, dos tres campus da UVigo, son as persoas encargadas de desenvolver as actividades que achegan o alumnado ao mundo da ciencia dun xeito lúdico e sinxelo, ao tempo que descobre a celebración da G-Night. «Estes preeventos permítennos chegar a un público obxectivo claro, que é o alumnado dos centros, porque se trata de espertar vocacións científicas e, máis aló de todo o que se mova ese día, a UVigo e todas as institucións implicadas queremos chegar a ese público para que participe e coñeza que se vai celebrar en setembro a Noite das persoas investigadoras», explica a vicerreitora de Comunicación e Relacións Institucionais da Universidade de Vigo, Mónica Valderrama.

As actividades previas á G-Night arrancaron nas cidades de Ourense e de Vigo, pero Mos, Baiona, Tomiño, Ponte Caldelas, Nigrán, Caldas de Reis, Redondela e Viana do Bolo completan o mapa de concellos no que se localizan os centros onde se están a desenvolver as actividades que abranguen temáticas relacionadas cos cinco ámbitos do coñecemento, desde o 5G ata a historia evolutiva do cancro, pasando polas matemáticas aplicadas á covid, as nanopartículas plasmónicas e a visión infravermella.

ESPERTANDO VOCACIÓNS

No ano do seu décimo aniversario, a Noite europea das persoas investigadoras regresará este outono a Galicia coa creatividade e a súa relación co coñecemento científico como eixe do evento, que se desenvolverá baixo o lema "Conciencias creativas". A G-Night encherá o 24 de setembro as cidades de Vigo, Ourense, Pontevedra, Santiago de Compostela, A Coruña, Ferrol e Lugo de actividades de divulgación en lugares afastados dos laboratorios, como son as rúas, museos, praias e bares, nun ambiente festivo, e co obxectivo de dar a coñecer o valor do traballo que desenvolven as científicas e os científicos, así como a importancia desta actividade na sociedade. «Con este anticipo nos centros escolares, o alumnado pode coñecer o tipo de actividades que se van desenvolver nas rúas, nas prazas etc., ese día. O maior valor é conectar cun público no que se pretende espertar vocación científica e que tamén participe de xeito activo, primeiro nestes preeventos, e logo, o día da celebración da G-Night», sinala Mónica Valderrama, que lles agradece ás investigadoras e investigadores da Universidade de Vigo a súa participación nos eventos que este mes se están a desenvolver nos centros de ensino.

Tras ser financiado con preto de 154 000 euros, procedentes do programa marco H2020, a través das Marie Sklodowska-Curie Actions (MSCA), as universidades de Santiago de Compostela e da Coruña, o Cesga, a Unidade de Cultura Científica da Delegación do CSIC en Galicia e do Instituto de Investigacións Mariñas, o Centro Oceanográfico de Vigo (IEO, CSIC), Gradiant, Itmati, Inibic e Sebbm, integran o consorcio, coordinado pola UVigo, que desenvolverá a Noite galega das persoas investigadoras que, ademais de nas cidades galegas, se celebrará de xeito simultáneo en máis de 360 localidades de toda Europa.n