A Vig-Bay alcanza os 7.257 atletas para bater o seu récord

As cifras son contundentes e a Vig-Bay superou onte todos os seus rexistros ó contabilizarse 7.257 atletas na liña de meta situada en Baiona. Unha nova marca para o evento que tiña no ano pasado a súa particular plusmarca con 5.712.

Non obstante, máis alá do global, o dato que destaca de xeito especial no evento de onte é o de 5.535 corredores que completaron a proba orixinal de media maratón. Coincidiu coa súa vixésimo quinta edición e bateu, en case 800 participantes, o evento de 2015 que tiña o récord con 4.785 persoas. Polo tanto, o evento superou as marcas en todas as modalidades xa que a Minibay, que existe dende 2022 tamén superou cifras ó pasar das 1.190 persoas do ano pasado ás 1.722 do presente. Un crecemento realmente notable. Outro punto relevante na evolución da Vig-Bay é o progreso da participación feminina porque a media maratón completárona 1.375 mulleres o que xa é un 24,84% do total do pelotón, que son números que non se podían intuír hai apenas un lustro e na distancia pequena da Minibay foron maioría con 979 (56%).

Os detalles do aniversario

Nun gran evento como é a Vig-Bay a organización sempre tenta ofrecer detalles ós participantes e unha das principais novidades do 2026 foron as medallas porque ó chegarse ó vixésimo quinto aniversario da cita, a medalla que se entregaba a cada participante era conmemorativa deste feito. Pero, observando de preto, tamén podíanse atopar outros detalles como o feito de que os participantes máis veteranos tiñan unha camisola especial en función da súa categoría se ‘Hito’, ‘Épico’ ou ‘Lenda’.

Aspectos de cada ano e outros que se manteñen constantes como o fermoso corredor de seguidores e familiares que se forma na recta de Baiona para a chegada dos deportistas. Algo que serve a todos os corredores. Tamén é notable a participación dos vehículos adaptados de Discamino ou o alto número de voluntarios que axudan á realización dunha proba que esixe moito persoal para poder sacar todo adiante. Todo é preciso para un evento que obriga a un enorme esforzo loxístico.