Na casa estamos ben

Día de calor, pero con esa brisa que achega o mar e que sempre refresca en Bouzas. Así viviuse o atardecer do Día de Galicia no ximnasio In Legatum cunha velada de emoción e co recinto practicamente cheo que permitiu ós boxeadores do club organizador do Rebouras ter un auténtico día de festividade e ledicia. Porque acadaron seis vitorias por unha única derrota, case un pleno.

A listaxe de enfrontamentos tivo como prato principal do menú o debut profesional de Juanca Alonso fronte a Manuel de Jesús, de Reus. Durou pouco o combate porque un golpe á zona do fígado tumbou ó deportista catalán e permitiu ó do Rebouras certificar a vitoria por KO no segundo asalto. A calidade notouse dende o comezo para resolver o combate. Nun solpor con moitas boas novas, a ledicia xa foi absoluta para toda a familia do Rebouras.

Anteriormente, a cita tamén tivo a disputa dun título galego neoprofesional, no que Álex Castro (CKM) superou a Luis Antonio ‘Vene’ (Turbo). Foi na loita de semifondo, na que non compareceu ningún integrante do Rebouras.

Si estiveron os locais no resto de enfrontamentos, con ata cinco vitorias e unha única derrota. A sesión de boxeo comezou coa primeira praza de Aisha Corredora sobre Alicia Portela (Narón) para despois verse a derrota de Carla Campo contra Daniela Serrano (Boxing Lugo). Foi a única para a expedición do club organizador. A continuación, Aloia Alcaraz superou a Ana Belén (Turbo).

Chegou o momento dos combates sénior e a tendencia mantívose coa vitoria de David González contra André Lago (Oz) e, no primeiro duelo neo-profesional da tarde, o triunfo recaeu en Víctor Lourido, que bateu a Diego Céspedes (Turbo Box). Despois chegaron os combates máis esperados da sesión e o peche de gloria para Juanca Alonso e, por extensión, para toda a familia do club vigués, que esperaba a principal cita da tarde e celebrou a vitoria.

Pouco a pouco, o sol do solpor entrou algo máis polas ventás do In Legatum para pechar a sesión boxística, que resultou, por entradas vendidas e espectáculo deportivo, unha gran xornada de boxeo polo Día de Galicia no barrio de Bouzas. Festa no almanaque e tamén celebración deportiva. En definitiva, un gran día.