Cos folgos do compañeiro

Unha mañá de remo para a rapazada en Cesantes. O club redondelán organizou unha actividade de Nadal para as categorías inferiores que chegaba como xornada de portas abertas para que os pequenos que o desexasen puideran probar esta modalidade deportiva nas instalacións do peirao de Cesantes.

Os cativos das categorías inferiores e algún invitado acudiron a xornada que consistiu nunha sesión de quecemento e competición de remoergómetro para as diferentes idades. Así, divididos en rolda clasificatoria e final, os remeiros subían á máquina para buscar o mellor parcial da xornada, mentres os compañeiros animaban ó máximo posible ós remeiros, especialmente nos últimos metros de cada quenda.

Así transcorreu a xornada que tivo unha particular entrega de premios con agasallos como roupa ou axendas e todos os presentes tiveron una medalla conmemorativa grazas ó seu notable esforzo. E, para rematar, como non pode faltar nesta época, compartiron un aperitivo os diferentes remeiros e os adestradores. Xornada de diversión dende os benxamíns ata os xuvenís.