Cabo da Cruz inicia o curso como rematou o anterior

Segunda regata da pretempada, a primeira do ano, e a realidade do remo galego parace que continúa igual que en 2023 e pasa polo mando claro de Cabo da Cruz que no Memorial Pepe O Ruso de Bueu obtivo a vitoria tanto na categoría masculina como na feminina. Non presentou a súa embarcación de veteranos e aproveitou Samertolameu para facerse coa primeira praza e amosar que este ano será unha tripulación de referencia nesta división.

Entre os homes sénior, o mando do barco de Boiro (20:20.40) resultou algo axustado porque Ares cruzou a liña de chegada a menos de dez segundos. Castropol foi terceira e Bueu, que esta tempada compite na liga ACT tras acadar o ascenso, asinou unha preocupante cuarta posición ó deixarse medio minuto cun barco co que compartirá máxima categoría.

Tirán Pereira e Chapela optaron por levar dúas traiñeiras sénior e de nivel equilibrado, de xeito que estiveron lonxe das primeras posicións. Queda tempo para definir o mellor equipo.

En mulleres, as remeiras de Boiro (23:16.92) arrasaron ó meter máis dun minuto ós seguintes barcos femininos. Especialmente alta foi a distancia con Tirán Pereira que, ó igual que o bote boirense, competirá na máxima categoría, a Liga Euskotren.

No referente ás traiñeiras que estarán na Liga Galega Feminina destacou Cesantes, cunha tripulación mixta con algún cadete, ante a ausencia de Chapela, gañadora en 2023. Tamén navegou o barco de Samertolameu, que volveu a xuntar unha tripulación, aínda que estivo na parte baixa.

Outra das principais novas da xornada tamén chegou dende o club moañés de Meira e foi nos veteranos porque obtiveron a vitoria nesta categoría por diante de Chapela, que foi sancionada con 10 segundos. Aínda así, a distancia entre os dous barcos foi de 11. Deste xeito, ‘Os Tercos’ amosan que serán unha das traiñeiras a seguir entre os maiores do remo galego, aínda que nesta categoría faltou Cabo da Cruz, que en 2023 foi superior ó resto de rivais. Redondeláns, moañeses e boirenses están chamados a marcar a pauta entre os veteranos.

O calendario de pretempada indica que o vindeiro sábado 27 de xaneiro dispútase a contrarreloxo de Cabo da Cruz. En febreiro está marcada unha regata en Ares e para o domingo 3 de marzo navegarán as traiñeiras na Ría de Vigo con motivo do Memorial Paco Fenosa de Chapela.