Unha viaxe para gozar e para descubrir o país

Poucos desprazamentos sairán mellor que o vivido onte en Zagreb para a afección do Celta. Soamente algúns románticos desexarían un horario máis tardío para gozar un pouco máis da festa previa porque a xornada na cidade croata resultou de dez, case deseñada por un artesán. Claro que a iso axudou a goleada asinada polo equipo vigués, que quitou calquera opción de desgusto. Todo foi celebración, ledicia, celtismo, felicidade entre cántigas.

Ben é certo que non se escoitaron como outras veces porque a afección local do Dinamo non parou de alentar no vetusto Stadion Maksimir. Incluso co marcador en contra de 0-3. Os visitantes gozaron cada gol e viviron unha segunda metade plena de celebración co traballo feito. Alí, en Zagreb, reuníronse moitos celestes procedentes de Vigo e arredores, que chegaron por diversos lugares e sempre con escala -para outros tempos quedou o avión privado- nun día de partido e de vacacións.

Porque as testemuñas falaban máis diso, duns días de turismo co Celta como argumentación ou escusa. Tras o sorteo da Liga Europa, había pouco tempo para deseñar o desprazamento ata Sttutgart, pero outra cousa xa foi a Zagreb. Uns comentaban que levaban dende o luns por Europa adiante, outros que chegaron o martes e algún máis que volverá o sábado. “Moi fermosa a cidade, pero algo vella”, indicaba un celtista na radio a pé de campo, uns minutos antes de comezar o enfrontamento. Non obstante, o antigo ten o seu encanto, como o propio Stadion Maksimir. Unha bancada baleira e as outras esperando o novo campo, que está en construción. Igual mellor así porque na particular viaxe turística, estaba o histórico campo. Foi parte central.