Fredi: “Tentaremos que este namoramento remate en matrimonio”

Fredi Álvarez asomaba onte sereo na sala de prensa da cidade deportiva de Mos. Sabe que esta tarde ten diante o reto máis sobranceiro da súa carreira deportiva e valora moito poder vivilo. “Ha 829 días que collín o Fortuna cunha presión moi grande porque con Claudio se xogaba moi ben. Tiña moito que perder o pouco que gañar”, lembraba o adestrador moañés, que reivindicou o play-off daquel ano e o do presente. “Dicían que o equipo xogaba só”, comentou con algo de pementa para os críticos mentres afondaba na declaración de amor que lle adicou ós seus xogadores en Ponferrada. “E a miña muller e a miña filla”, puntualizou. Pero non quedou aí: “Tentaremos que este namoramento remate en matrimonio”.

Con esta frase tan redonda pode resumirse unha comparecencia de máis de 20 minutos na que Fredi insistiu na “oportunidade histórica” que teñen o seus rapaces, mais tamén remarcou a necesidade de desfrutar dun partido memorable para futbolistas, técnicos e siareiros, que apuntan a encher Balaídos. “Nunca agardei tanto apoio. En Barreiro xogamos diante de 1.500 persoas”, suliñou o adestrador morracense.

Álvarez tamén valorou, como case todo o mundo fai, a madurez deste filial, tan competitivo e capaz de amarrarse ós partidos. “Iso está moi ben, pero coa madurez non nos alcanza”, advertiu, antes de soltar a chave de todo este tinglado, que tantas e tantas veces se esquece: “Hai que xogar ó fútbol”.

Para que iso suceda coma quere o equipo celeste, será importante manter a calma ante unha Ponferradina experta, que xa trabou o partido no Bierzo e que hoxe apunta a facelo aínda máis. “No segundo 2, xa agreden a Óscar (Marcos)”, lembra sobre a primeira acción do partido de ida. “Os nosos dianteiros estiveron todo o rato agarrados polos seus centrais. Foron partidos super difíciles porque sabíamos que tipo de escenario íamos atopar e iso temos que seguir mantendo. Creo que se vai a multiplicar todo iso”, recoñeceu. “Temos que estar concentrados e non trabucarnos”, rematou o técnico do Fortuna, xa listo para facer historia.

“A importancia do balón parado no fútbol é moitísima”

É un tópico, mais tamén unha realidade. Unha final coma a de hoxe adoita a resolverse por detalles. Por iso, Fredi Álvarez debe equilibrar a imperiosa necesidade de reducir os erros á mínima expresión coa natureza ofensiva e alegre dos seus xogadores. “É unha das cousas máis difíciles”, recoñecía o morracense. E máis contra unha Ponferradina “que defende e corre ben”. Por iso advirte do “problema” que pode supoñer “non controlar as súas transicións”. Nese sentido, as vixiancias cobran unha importancia capital. “Cando perdes o balón tes que estar preparado para que o equipo rival non te faga dano”, suliña.

Nese senso dos matices entra o factor máis desequilibrante neste fútbol actual tan igualado, tan trabado, tan competido. “Todos entendemos que a importancia do balón parado no fútbol é moitísima”, recoñece. Tamén o será hoxe. A favor -"ter un executor como Hugo (González) é fundamental", destacou- e en contra -"hai que traballar", advertiu-. “Anxo ou Meixús non chegan ó 1.80. Concentración”, analizou Fredi, que desvelou que o Celta contratou o ano pasado a un especialista nesta sorte “que ven puntualmente por aquí” e no presente curso a outro “en saques de banda, que estaba na Premier”. Unhas novidades que se enmarcan nun paso adiante neste eido. “En inferiores no se lle adicaba moito tempo porque non o necesitas. Pero cada vez se lle da máis importancia”, rematou.

“Unha cousa é celebrar e outra cousa ben distinta é desfrutar”

A Medhi Nafti non lle sentou ben que os rapaces do Fortuna pasasen un bo rato cos seus siareiros en Ponferrada tralo 0-0 da ida hai sete días. “Os do Atlético de Madrid (B) tamén celebraron”, chegou a dicir na rolda de prensa do Toralín en referencia á eliminatoria anterior, na que o filial colchoeiro firmou o mesmo resultado co do Celta e logo perdeu na casa (0-1) para quedar eliminado.

Preguntado sobre isto, Fredi non quixo entrar en polémicas, mais si que fixo unha apreciación. “A min ensináronme que unha das cousas máis importantes da vida é ser feliz. Ás veces, non se valora iso. Pero desfrutar coa túa afección é ser feliz”, iniciou o morracense a modo de prólogo. “Nós non celebramos nada. Unha cousa é celebrar e outra ben distinta é desfrutar”, insistiu o adestrador do Fortuna.

“Queremos 30.000 en Balaídos”

Nafti volveu falar onte e amosouse confiado nas posibilidades da Ponferradina e desafiante con respecto ó ambiente agardado hoxe en Balaídos. “Lin que pode haber 20.000 espectadores en Balaídos. O que che podo asegurar é que os meus xogadores quererían 30.000”, suliñou o técnico, que pensa que “os futbolistas con experiencia teñen vantaxe nestes partidos”.