Chis Oliveira, recoñecida co Premio de Igualdade Ernestina Otero 2021

O Consello municipal da Muller escolleu a Mercedes “Chis” Oliveira como a gañadora deste ano do Premio Igualdade Ernestina Otero. Doutora en Filosofía e Pedagoxía pola Universidade de Santiago e catedrática de Filosofía no IES Alexandre Bóveda ata o seu retiro, Chis recibiu onte a noticia “por completa sorpresa”, admitiu. “É un recoñecemento moi especial porque o elixen compañeiras da loita feminista”, afirmou Oliveira.

Chis é unha das activistas máis destacadas no ámbito da igualdade, cunha intensa labor nas aulas, sendo pioneira co “Comando Igualdade”, a asociación de mocidade galega feminista, hai xa 36 anos. “Ver que as familias recoñecen ese labor, que abre portas e facilita a comunicación dos pais cos fillos, é moi gratificante”, admitiu. Ademáis no ámbito intelectual conta cunha extensa lista de publicacións co perspectiva de xénero, que xa lle levaron a acadar outros recoñecementos. Viguesa Distinguida no 2017, tamén foi Premio Nacional de Educación e Sociedade a materiais didácticos de innovación educativa do Ministerio de Educación no 1995.

A entrega do Ernestina Otero a Chis Oliveira coincidirá co recoñecemento a María Xosé Porteiro, gañadora do premio no pasado ano que non se puido oficiar pola covid.