Carmela Silva despídese da Deputación como chegou, “con mulleres”

Carmela Silva afrontou onte a súa última intervención como presidenta provincial. Fíxoo na entrega de premios “Hai unha voz”, promovidos pola Deputación e a asociación Clásicas e Modernas para recoñecer a pegada das mulleres neste ámbito, que este ano recaeron en Marilar Aleixandre, Rexina Vega e Esther Carrodeguas.

Silva destacou que quixo despedirse rodeada de mulleres, ao igual que o primeiro día do seu mandato no 2015: “Entón, en Pontevedra, ilusionada e coa claridade do camiño que queriamos escoller, quixen deixar claro que o irrenunciable compromiso coas políticas de igualdade ía ser un dos sinais de identidade deste goberno que agora cesa; oito anos despois remato do mesmo xeito que empecei”. Recoñeceu que sempre quixo rodearse de mulleres, “particularmente das mulleres da literatura e da cultura que teñen tanto poder para cambiar o mundo; pero se algo tiñamos claro tamén é que, ao igual que en tantos outros ámbitos, as mulleres tampouco ocupamos neste eido o lugar que nos corresponde, tras toda unha

historia de silencio e de renuncias”.

Así, destacou que o Manifesto de Soutomaior, do que xorden estes premios, “era unha débeda que tiñamos con esas mulleres silenciadas na literatura”. Subliñou que “este inmenso traballo merece ser recoñecido e posto en valor”. Afirmou que hai moitas mulleres en tódolos sectores “soamente precisamos ver con outra mirada, lila, necesaria, fundamental, para poder crear un mundo xusto e democrático”.

Visiblemente emocionada, Silva agradeceu o apoio “e a vosa complicidade na rede de afectos e traballo conxunto que fomos entre todas capaces de tecer” e concluíu sinalando que “quedan moitos capítulos por escribir, pero a igualdade é o mellor título que podiamos escoller”.

O acto arrancou coa lectura dun poema de Luz Pozo Garza a cargo de Silvia Penas, quen xunto ás súas compañeiras presentadoras incidiu na “vitoria de que estes premios existan, porque colocan a nosa atención no traballo inxente e incalculable que tantas mulleres realizan ao longo das súas vidas; mulleres que con esforzo, intelixencia e dedicación lanzan unha faísca para que prenda nas nosas mentes e o milagre da literatura aconteza”. O acto foi retransmitido por streaming e conducido polas escritoras do proxecto “Literarias” Mariana Carballal, Isabel Blanco, e Silvia Penas, e onde sonou tamén con forza a voz da cantante Guadi Galego.

Penas, Carballal e Blanco lembraron as doce decisións do Manifesto de Soutomaior e as distintas actuacións derivadas deste compromiso coa literatura, amais dos premios, entre elas o libro colectivo “Ti non sabes o que é ser escritora”.

A primeira en recibir o galardón, dotado con 5.000 euros, foi Marilar Aleixandre, quen quixo agradecer “este premio a unha escrita sobre a violencia social, que é a miña e tamén a de Rexina e Esther”. Carrodeguas lamentouse de que a escritura se faga no tempo libre: “Non podemos como pobo permitir que a cultura que nos constitúe se redacte no tempo que nos sobra”. O xurado tamén premiou o labor desenvolvido por Rexina Vega como escritora, profesora e investigadora.