Un bo regreso do Lóstrego

Fin á traxectoria negativa. O Lóstrego acadou onte a vitoria contra o Lugo no campo gondomareño de Chaín e racha unha xeira de seis derrotas consecutivas. Uns resultados moi negativos que chegaron ó seu fondo coa derrota contra o colista de hai unha semana. Un enfrontamento que parece que fixo espertar ás de Gondomar, que onte volveron a sumar os tres puntos tras ofrecer unha boa versión.

As locais amosaron onte un bo nivel de fútbol ante un opoñente que apenas chegou ó area contraria. Tiveron ocasións as gondomareñas e, curiosamente, resolveron o partido con dous bos puntapés dende fóra do área. O primeiro de Laura Izard, que enviou ó fondo da rede unha falta directa pasada a media hora de xogo, e o segundo tanto asinouno Nara Fernández cun disparo dende fóra que pegou nunha rival para despistar a Vera Pérez e chegar o balón ata o fondo da portería.

Así, o Lóstrego racha unha xeira moi negativa e regresa a esa loita pola honra de ser o mellor equipo do área de Vigo ó final da tempada. Está situado na quinta posición con 31 puntos, os mesmos que o Sárdoma. Ademais, o terceiro, o Olímpico, acumula dúas unidades máis. Máis aló do numérico, Gabi Couñago recuperou nos últimos días a varias futbolistas mancadas e isto favoreu o aumento do nivel do seu equipo.