A sutileza da liña que fía Nerea Cordeiro

“Entendo a arte como un medio a través do que canalizar memorias e vivencias. Ao tempo que recoñezo unha certa tendencia cara á a repetición en tódolos meus traballos”. Así presenta a súa produción Nerea Cordeiro (Pontevedra, 1999), a artista que onte inaugurou a mostra “Sobre debuxar, fiar e habitar” na sala Maruja Mallo, da Deputación.

A artista declara perseguir “constantemente as mesmas inquedanzas e preguntas, aínda que formuladas de múltiples xeitos, que en último termino atopan a súa transposición na arte. Estas poden definirse a través do significado que lle confiro a dous infinitivos en particular: fiar e habitar”. Autodefiniuse como “unha artista multidisciplinar, que adoita traballar coa instalación e coa intervención”.

Nas súas obras crea escenas, atrapadas entre as liñas que se confunden cos fíos. O trazado, sen cromatismo, ante o fondo branco constrúe un universo envolto. Transcorre entre os límites do debuxo e da escultura.

As pezas están integradas nas súas últimas series “Cidades telaraña” e “Figuras de cordas” e permanecerán en sala ata o día 25. Dous días antes da clausura, organizarase un percorrido guiado pola artista, ás 19 horas. Cordeiro está a facer un mestrado en Investigación da Arte Contemporánea na Universidade Complutense.

“É unha mostra na que Nerea mestura linguaxes artísticas diversas: desde debuxo ou gravado ata a intervención espacial”, afirmou a vicepresidenta da Deputación, Luisa Sánchez, onte na presentación da exposición. Aproveitou para felicitar á artista, ante os numerosos premios, certames e exposicións que a avalan, “só hai que ver a túa obra para entender por que; estou segura de que tes un futuro máis que brillantes por diante”, apuntou. Sánchez remarcou o compromiso da administración provincial co “talento creativo da provincia” e destacou “o poder transformador da cultura, especialmente da arte”.