Sotelo e Clara con festa e cea cerraron a campaña en Cangas

O PP destacou a moita asistencia a todos seus mítines e os nacionalistas fixeron fincapé nas moitas obras feitas para todos

Oresultado das eleccións municipais de mañá domingo en Cangas é moi incerto, posto que despois destes 4 anos de goberno de esquerdas, primeiro BNG-PSOE-ACE, e dende xaneiro de 2010 nacionalista-socialista, a esquerda quedou moi dividida, de feito a Alternativa Canguesa de Esquerdas asegura que co seu voto os alcaldables de BNG e PSOE, Clara Millán González e Héctor Fabián Otero Paredes, non se sentarán na Alcaldía, pero o PP para asegurar que José Enrique Sotelo Villar será alcalde ten que sumar 11 concelleiros, e no 2007 sacou 8, ano no que como agora tamén presenta candidatura un exconcelleiro seu, Bernardino Faro Lagoa, ao fronte de Unión das Parroquias de Cangas (Upac).

Sotelo Villar durante a mañá repartindo o programa e voto, e Clara Millán nun mitin no Hío.

Onte pola noite os populares celebraron con orquestra a romaría de fin de campaña no fermoso adro de Darbo, que rexistrou unha excelente animación. Antes, pola tarde, o presidente do PPdeG e da Deputación, Rafael Louzán Abal, fixo un percorrido pola vila acompañando ao alcaldable, Sotelo Villar, que pola noite tivo o apoio do concelleiro de Medio Ambiente, Agustín Hernández.

Cada venres hai mercado ambulante en Cangas, e onte foi aproveitado polas candidaturas para facer o último gran reparto de propaganda e voto. Sotelo, que participou no reparto, destacou a grande asistencia de público a todos os mitins, ata nos barrios máis pequenos, aproveitando para agradecer ese interese por escoitar as propostas do PP.

O BNG, pola súa banda, tamén fixo onte ese último esforzo por tratar de manter a Alcaldía, coa participación da propia alcaldesa e candidata, Clara Millán, que aínda así non deixou de lado as súas obrigas ao fronte do Concello nin no último día de campaña.

Cunha cea pechou campaña o BNG, destacando que 'nos últimos 4 anos tense realizado o maior esforzo transformador da historia de Cangas'.