Quempallou tocará en Cangas na Festa do Muíño de Coiro

A 'Festa do Muíño de Coiro', en Cangas, arranca mañá venres coa presentación no centro cultural pola Comunidade de Montes desa parroquia da 'Guía das Árbores do Muíño de Fausto', muíño arredor do cal ten lugar a festa o vindeiro sábado e domingo, destacando a noite folc do sábado con Xarope de Uva e Quempallou.

A presentación da guía terá lugar mañá venres ás oito e media do serán, mentres que o sábado pola mañá, dende as once e media e no colexio Castrillón, haberá unha gran festa infantil organizada pola asociación folclórica Tromentelo.

O forte da Festa do Muíño, que organiza a asociación cultural Cacarexo, está anunciado para o sábado e o domingo no Muíño de Fausto. Así, o sábado ás seis e media haberá unha mostra de baile e música tradicional cos grupos Ximalveira, Pandereteiras e grupo infantil de Lembranzas da Ría e Xente Xoven, rematando a xornada coa noite de folc cos grupos Xarope de Uva e Quempallou, aproveitando Quempallou para presentar o seu novo disco 'Vellas novas'.

En canto ao domingo, Tromentelo tocará pasarrúas ao mediodía, e á unha o mestre gaiteiro e investigador moañés, Xavier Blanco, dará o pregón, rematando a festa deste 2012 coa música tradicional desde as seis e media da tarde a cargo de Sons do Muíño e Abaladoiro.

Non faltarán na festa, como outros anos, as empanadas, ovos con migas, viño e outros produtos.

Contenido patrocinado