Un “punto e aparte” para a editorial Catro Ventos

A editorial viguesa Catro Ventos anunciou o peche da súa cooperativa, aínda que a marca editorial non desaparecerá. Segundo explica Isidro Dozo, un dos seus membros, o cese da actividade e da cooperativa non implica o peche da marca, xa que agora estudan novos camiños e haberá continuidade. “A marca terá continuidade e o proxecto seguirá na mesma liña á hora de sacar proxectos”, asegura.

Para facilitar a transición, a editorial puxo todo o seu catálogo a disposición do público en saldo ata o 30 de novembro. Dozo sinala que “o proceso de poñer o catálogo dispoñible en saldo veu despois de traballar e acordar coas editoriais en orixe”. A partir desta data, os títulos actuais deixarán de estar dispoñibles, coincidindo coa pechadura trimestral anual da cooperativa e co inicio dunha reorganización cara a 2026.

O peche da cooperativa responde á busca de novos horizontes profesionais e á conciliación laboral. “Agora chegamos a un punto que nos impedía continuar co proxecto. Facémolo para mellorar os valores laborais e poñer ás persoas primeiro”, afirma Dozo. Catro Ventos naceu en 2016 como proposta de Miguel e Cristina Braña, a última deixou a cooperativa hai tempo, preocupados pola escaseza de literatura en galego sobre ecoloxía, dereitos humanos ou crianza alternativa, entre outros temas. “A editorial conta con profesionais cun perfil complementario para traducir, maquetar e distribuír. A complexidade da cadea era facer ecoedición, aplicando valores ambientais á produción, reducindo plásticos e mellorando a pegada de carbono”, explica Dozo Valladares.

A pesar do cese da cooperativa, a marca manterá a súa liña de ecoedición e ofrecerá servizos editoriais como tradución, maquetación e distribución, garantindo a continuidade do proxecto. As persoas que forman a cooperativa neste momento son Alicia Rodríguez Malga, Isidro Dozo Valladares, María Mediero Mayán, Miguel Braña Montaña e Patricia Buxán Outeiro.