Máis de 250 rapaces berraron "Fálame" co convite do Correlingua

O Correlingua volveu a esixir a normalización no uso do idioma entre a mocidade. Así, Vigo foi unha das primeiras prazas que acolleron esta mobilización polo galego, que pon a guinda a toda unha programación traballada nas aulas.

Máis de 250 nenos do CEIP Otero Pedrayo, o CEIP Balaídos e o IES Santo Tomé respostaron á convocatoria realizada este ano e acudiron ao auditorio municipal, aínda que a primeira convocatoria centrouse na Praza do Rei, onde se estableceu o punto de encontro. A través de conexións por streaming á súa canle de Youtube, seguiron a cerimonia escolas de toda Galicia.

O lema deste ano e sobre o que se baseou o manifesto foi “Fálame”, que onte converteuse en todo un berro de guerra, para reivindicar a sensibilización lingüística cos máis novos. Sobre esta idea escribiuse o manifesto deste ano nos obradoiros “Desata a lingua”, coa participación de alumnado de nove institutos co de Santo Tomé como representante de Vigo. A festa, que durou perto dunha hora, estivo dirixida polo showman Fran Rei e contou co saúdo do alcalde Abel Caballero á rapazada. A nota musical púxoa a banda de Salceda de Caselas, Zënzar, participante no concurso de rock, convocado polo evento, “Cantalingua”.

Neste mes, o Correlingua, organizado por CIG Ensino, a Mesa pola Normalización e a Asociación Psicopedagóxica Galega percorrerá as localidades das provincias de Pontevedra e de Coruña, hoxe estará na Praza do Seixo en Tomiño con Mekánika Rolling Band e para a semana en Cangas. Ourense e Lugo fican par aos meses de setembro e outubro.

“Coa pandemia tivemos que adaptarnos, deixar as convocatorias multitudinarias e as andainas, pero a nosa intención e retomar o formato cotiá a partir da vindeira edición”, afirmou Anxo Terán, presidente do Correlingua, que apuntou a necesidade de manter as edicións pese ás limitacións. Amosouse moi satisfeito co seguimento que tivo o evento, pese as limitacións. Calcúlase que entre maio e outubro mobilizará uns 15.000 menores por todo o país en defensa do uso do idioma. Esta edición finalizará o 26 de outubro cunha festa que terá lugar no Auditorio Gustavo Freire de Lugo.

“Poden participar tódolos centros que queiran, é un proxecto para traballar todo o ano con concursos, obradoiros de bandas deseñadas ou actividades nas redes sociais”, apunta Terán.