A Deputación reserva 250.000 euros para a Tribuna mundialista

A vicepresidenta da Deputación de Pontevedra, Luisa Sánchez, anunciou onte que os orzamentos provinciais de 2027 reservarán 250.000 euros para participar economicamente na redacción do proxecto de ampliación da grada de Tribuna do estadio de Balaídos, no marco da candidatura de Vigo ao Mundial 2030. Segundo precisou, a contía prevista é estimada, xa que “o Concello de Vigo aínda non fixo público o custo exacto da elaboración do proxecto”. En todo caso, tal e como aclarou Luisa Sánchez, o importe poderá axustarse posteriormente.

“Todos queremos que Vigo sexa sede do Mundial e, unha vez rematada a reconstrución da bancada de Gol, que culminará en 2027 cun investimento provincial de 13 millóns de euros, hai que seguir adiante”, sinalou a tamén deputada de Deportes, quen lembrou que a Deputación inviste preto de 28 millóns na reforma global de Balaídos. Deste xeito, engade que ”malia que nin a Deputación nin a cidade coñecen o cronograma que permitiría chegar a tempo ao verán de 2030", a institución remarca o seu apoio ás actuacións precisas para gañar aforo no estadio e cumprir as esixencias da FIFA para que Vigo sexa sede do Mundial que acollerá España.

Nesta liña, avanzou que os orzamentos de 2027 manterán o apoio a diferentes actuacións que a Deputación xa ten en marcha en Vigo como a reforma da piscina de Teis, cun investimento de 5 millóns.