O Liste, tralos pasos de Castelao pola súa colección

Un dos obxectivos do Museo Etnográfico Liste é transmitir aos máis novos o saber das xeracións pasadas e o seu xeito de vida. A través da actividade “Dende as lentes de Castelao”, utilizan a obra do intelectual para explicar os obxectos que forman parte da colección permanente do museo.

Cunha duración aproximada de 90 minutos, vai dirixido a un público mozo que na maioría é a alleo á tradición. Comeza cun percorrido guiado “Do propio e do alleo: outras artes, outras etnográficas”, cun achegamento ao obxecto dende a literatura de Castelao e doutros autores que tamén amosaron a súa cultura nas súas obras. Así, o de Rianxo describe útiles na vida cotiá en historias como “Ollos de vidrio” ou nos relatos de “Cousas” que os visitantes poderán identificar nas salas do Liste.

A través de “Nunha aldea de Galicia” recréanse os personaxes das sociedades rurais nas que o traballo comunitario aseguraba a supervivencia como o narrou en “Os dous de sempre”. A colección etnográfica inclúe aparellos utilizados nestas labouras moitas veces agrícolas como a tulla escavada en madeira ou as prácticas da cultura do centeno. Complétase nas seccións de oficios, con exemplos como o tratante de cornello ou o rolleiro; a da luz, a de tecidos ou a de peches.

Neste terceiro trimestre do ano, o museo recibe visitas de turistas e fundamentalmente de rapaces en campamentos, polo que a súa programación paralela céntrase en parte neste público. Ofrece ata once actividades diferentes en torno a pezas custodiadas: O grande invento da escritura, o asedio, un día con Xan e Maruxa, Os sons do traballo; Bruxuleando, Enigma, Hábitos alimentarios ou aprendiz de museólogo, onde os visitantes asumen a responsabilidade de montar unha exposición.

A mostra temporal, “A cultura enmascarada”, amosa 25 carautas de Entroidos espellados por distintos territorios. O Museo Liste, na rúa da Pastora, abre de martes a sábado, de 10 a 14 horas, e mércores tamén pola tarde de 17 a 19 horas.