O IES Santa Irene lembra a Xosé Humberto Baena, Xosé Luis Sánchez-Bravo e Moncho Reboiras

O grupo de traballo sobre memoria histórica constituído no IES Santa Irene celebrará o próximo 24 de setembro o seu primeiro acto, que consistirá nunha homenaxe aos exalumnos do instituto asasinados polo franquismo. Trátase de Moncho Reboiras e Xosé Humberto Baena, que foron alumnos de pleno dereito no histórico centro educativo das Travesas, e Xosé Luís Sánchez-Bravo, que fixo os exames da reválida no Santa Irene. Xustamente este mes cúmplense 50 anos da execución dos dous últimos, mentres que Reboiras foi represaliado en agosto de 1975.

O acto está dirixido ao alumnado de 2º de Bacharelato. “Eliximos este curso porque o franquismo figura no temario”, apunta Ismael Alonso, vicedirector do instituto e impulsor do grupo de traballo sobre memoria histórica. A homenaxe comezará cunha pequena introdución a cargo dun grupo de alumnos voluntarios que estiveron involucrados na primeira actividade deste grupo de traballo, que xirou en torno a coñecer a historia do reloxo da torre do IES Santa Irene, cuxo creador foi tamén represaliado.

Tamén intervirán Flor Baena e Manuel Reboiras, irmáns de Xosé Humberto e Moncho, e lerase un texto da irmá de Sánchez-Bravo. Por último, haberá unha charla de Magda Oranich, que formou parte das defensas dos represaliados en Vigo.