Iberos presentou os seus avances en cancro, neuroloxía e aparello locomotor

Os avances expostos co gallo das IV xornadas que celebra o instituto céntranse en abordaxes innovadoras sobre o cancro e as doenzas neurolóxicas, do aparello locomotor e do sistema vascular, todas elas desde a óptica do envellecemento.

O Grupo de Novos Materiais da Universidade de Vigo presentou un proxecto que ten o ácido poliláctico como protagonista. Os investigadores están a desenvolver métodos de esterilización para os dispositivos cirúrxicos fabricados a partir deste ácido que evitan o dano que as técnicas convencionais (como a radiación gamma ou o autoclave) exercen sobre el, dado que non resisten temperaturas elevadas.

Iberos, que naceu co apoio do Programa Operativo de Cooperación Transfronteiriza Interreg España-Portugal, conta cun orzamento de preto de 2 millóns de euros ata 2020 para que os seus 152 membros compartan coñecemento e desenvolvan proxectos conxuntos. Nel intégranse 13 grupos de investigación das Universidades de Santiago, Vigo, Minho e Católica Portuguesa-Centro Rexional do Porto; do Instituto de Investigacións Mariñas) do CSIC; do Instituto de Investigación Biomédica da Coruña; do Instituto de Engenharia Biomédica e do Instituto Superior de Engenharia do Porto.n