Experto pide un 'trato cívico' aos maiores e desterrar o 'paternalismo'

Vázquez, que hoxe participa na XXI Reunión Anual de Psiquiatría en Vigo, opina que en España 'non existe un bo modelo' de centros de maiores porque estes 'deben centrarse na persoa, aproveitar as súas capacidades, e non fixarse nas limitacións' para poder converterse na 'vivenda do usuario' e no seu 'medio de apoio'.

Así, avoga por 'xerar espazos' nos que os maiores poidan 'manterse activos' e fomentar o seu benestar a través do 'primeiro bo trato, que non é outro que o cívico', informa unha nota da organización do congreso que acolle entre hoxe e mañá o Auditorio Mar de Vigo.

Este especialista no estudo do abuso e o maltrato ás persoas maiores opina que se debe 'romper a vulnerabilidade' da terceira idade 'no medio institucional e familiar' para poder detectar 'manifestacións de malos tratos'.

Iso si, cre que falar de malos tratos 'estigmatiza a poboación de máis idade', pois esta actitude 'segue cargando a perspectiva social dos maiores'.

Outro dos especialistas que achegan a súa experiencia na Reunión Anual de Psiquiatría é o presidente da Sociedade Galega de Xerontoloxía e Xeriatría, Andrés Vázquez, quen apunta que a incidencia das enfermidades mentais entre os maiores 'supera sobradamente' o índice medio da poboación do 25 por cento.

Vázquez chama a atención sobre a 'altísima' prevalencia de patoloxías relacionadas coa ansiedade entre as persoas maiores, e destaca que a depresión é o trastorno con maior frecuencia e transcendencia, que afecta ao 30 por cento dos maiores de 65 anos, e ao 35 por cento dos que viven sós, hospitalizados ou internados en residencias.

Advirte de que cadros concretos, como a depresión con ansiedade, na maioría dos casos non se atenden ou pasan case desapercibidos pola falta de información e formación 'específica e especializada que requiren os novos tempos e as novas afeccións'.

Nese contexto, considera 'transcendental abordar o uso, diagnóstico e abuso dos psicofármacos' empregados para tratar estas patoloxías, tendo en conta que 'o seu mal uso produce danos colaterais'.