O DOG publica a licitación do centro de día de Baiona, que ofrecerá 40 prazas para maiores

O Diario Oficial de Galicia (DOG) publica este luns a licitación do equipamento do centro de día de Baiona (Pontevedra) que está situado en Sabarís. Este servizo contará cun total de 40 prazas para persoas maiores dependentes ou en risco de selo.

Segundo informa a Consellería de Traballo e Benestar, os pregos para esta iniciativa inclúen un presuposto de 85.595,60 euros para a licitación do equipamento, mentres que o prazo para presentar a documentación é de 15 días naturais contados a partir deste martes.

A licitación do equipamento publícase días despois de que se adxudicara a xestión dese centro. O Consorcio Galego de Servizos de Igualdade e Benestar asumiu en 2010 o compromiso de concluír a construción e de desenvolver as obras de urbanización da parcela, unha actuación que superou os 380.000 euros.

Estas novas dependencias integraranse na Rede de Centros de Atención a Persoas Maiores do Consorcio, que inclúe equipamentos socio-terapéuticos e de apoio ás familias que ofrecen unha atención terapéutica integral. Desta forma, promóvese a autonomía persoal, a actividade relacional e a permanencia no ámbito habitual dos usuarios.

Contenido patrocinado