A Deputación e o Consulado de Arxentina estreitan lazos

A Deputación de Pontevedra e o Consulado Xeral da Arxentina en Vigo porán en marcha proxectos comúns na provincia e tamén ao outro lado do Océano Atlántico para reforzar os estreitos lazos históricos que unen as comunidades galega e arxentina. A presidenta Carmela Silva e o cónsul Horacio Martín Doval reuníronse onte na sede da institución en Vigo para sentar as bases da colaboración e comezar a traballar de inmediato nunha programación de actividades. “Temos que poñer en valor os nosos vínculos afectivos, sociais, culturais e económicos; hai unha intensa relación entre as nosas comunidades que non podemos perder”, subliñou Carmela Silva, quen adiantou a súa intención de organizar unha acción cultural na capital arxentina a finais de 2022 ou nos primeiros meses de 2023. O cónsul, que asinou no Libro de Honra da Deputación, cualificou a proposta de “excelente” e coincidiu na importancia de manter os lazos históricos. Así, anticipou que o Consulado que representa “empezará a traballar nun plan de actividades para todo este ano” en coordinación coa Deputación.

Ambas institucións colaboraron recentemente en “Cinema Mulleres”, un ciclo con proxeccións e coloquios celebrado en decembro no Museo de Arte Contemporáneo para dar visibilidade, reflexionar e debater con perspectiva de xénero no cinema nos contextos de Galicia e Arxentina. “Foi unha iniciativa coa que establecemos redes, e é importante que a sociedade civil participe coas administracións públicas", indicou Silva.