Dakidarría presentará novo disco na sala Master

Dakidarría, un referente da música contestataria do país, chegará o vindeiro 6 de maio á sala Master Club de Vigo para presentar o seu novo disco, “Colaxe”. Unha noite na que os acompañarán como convidados a banda La Quinkillada. A información das entradas está dispoñible en www.dakidarria.com A banda, que vén de actuar no Viña Rock, comeza a rodar coa súa xira “Colaxe Tour 22” para facer soar o seu novo disco, “Colaxe”, en salas e festivais de toda a Península.

“Colaxe” é o sexto disco de estudio de Dakidarría onde o grupo percorre as diversas influencias musicais que o fixeron medrar e chegar ata o presente nun estado de forma envidiable tras 18 anos de carreira. Con ampliación da súa formación, a agrupación musical retoma a estrada neste 2022 para descargar a emoción, a enerxía e a adrenalina dos seus concertos en todos os lugares que sexa posible. Novas caras que darán máis fluidez e dinamismo a un show que, se antes era incendiario, agora pasa a ser explosivo. Un combo que pretende arrasar os palcos e que vai deixar pegada na escena musical galega.