“Dakidarría é un barco e vós sodes o noso mar”

Gabri, Simón, Antonio, David, Juaki, Anxo, Carlos e Ximo Tomás son Dakidarría. Este sábado celebraron en casa o seu décimo aniversario cun concerto baixo o berro "Dakidarría é un barco e vós sodes o noso mar". Supuso un encontro moi especial cos seus primeiros seguidores, colgando o cartel de non hai entradas na sala Máster Club, tal e como recoñeceu onte Gabri: "Tivemos un cheo absoluto e foi moi emotivo porque xogabamos na casa; queríamos que a primeira actuación da xira en 2014 fora en Vigo e resultou como esperabamos".

Con catro discos no mercado ("Fragasaurus Rex", "El futuro nunca existió", "Realidades alineantes" e "Utopías emergentes", ademais da primeira maqueta "Diskordía nas Rías Baixas"), a agrupación recoñece unha evolución dende os postulados punk dos inicios ao estilo máis mestizo que os caracteriza e onde hai influencias de ska, reggae ou xamaicano, sen renunciar ao calificativo de banda festeira que os fixo famosos. "Somos un grupo reivindicativo, pero tamén alegre, penso que é o único xeito de sobrevivir neste mundo, a rebeldía sempre ten que ir acompañada por alegría, e esa é a mensaxe que queremos dar", apuntou Gabri. Así, lembrou a orixe de Dakidarría en 2003, nun Concerto Expansivo, no bar Patos en protesta pola xestión da crise do "Prestige": "Naceu sen embarazo previo, xurdíu sen máis, non foi planeado, simplemente, de repente, estabamos dando o noso primeiro concerto". A partir de aí xa non pararon. Levan dende maio na xira do décimo aniversario que se prolongará ata os festivais de verán, onde tamén haberá saídas á Europa, cun concerto en Frankfurt e un par deles en Francia. Despois xa toca compoñer novos temas.