Batalla contra invasoras: máis de 15.000 fóra de Cíes

Máis de 15.000 brotes de coniza foron recollidos nas Illas Cíes durante os traballos desenvolvidos polo Campo de Voluntariado do Parque Nacional. Unha cifra que pode parecer anecdótica fronte á inmensidade do arquipélago, mais que reflicte un dos problemas de conservación menos visibles dos espazos naturais protexidos: a expansión de especies vexetais exóticas.

A coniza, pertencente ao xénero Conyza, é unha planta orixinaria de América do Norte que leva décadas estendida por Galicia. Unha das especies máis habituais, Conyza canadensis, pode alcanzar ao redor de metro e medio de altura e reprodúcese exclusivamente mediante sementes. A ameaza da coniza é fundamentalmente ambiental, especialmente cando aparece en espazos naturais sensibles. As administracións inclúen a Conyza canadensis entre as especies alóctonas invasoras presentes en España e atribúenlle un nivel de ameaza elevado.

A propia Xunta sinala que en Galicia a coniza aparece principalmente en terreos alterados e nalgúns areais costeiros.

O problema adquire outra dimensión nun territorio insular como Cíes. As illas contan con ecosistemas especialmente fráxiles e con comunidades vexetais adaptadas a unhas condicións moi concretas. A chegada e expansión de especies foráneas pode xerar competencia coas plantas autóctonas e modificar o equilibrio ecolóxico.

O propio Parque Nacional das Illas Atlánticas recoñece que a presenza de especies alóctonas que compiten, desprazan ou mesmo poden depredar sobre especies autóctonas constitúe un problema de conservación especialmente acentuado nos medios insulares.

A actuación dos voluntarios enmárcase nunha estratexia de conservación máis ampla.