Arte e sexualidade, na Fundación Laxeiro

'Estas xornadas nacen da observación do estancamento en cuestións de xénero que se observa no mundo da creación e a programación artística', apuntan dende a organización, engadindo que 'cambiar esta situación implica unha transformación dos modelos estéticos e arquetipos culturais imperantes nos ámbitos creativos e de comunicación'.

As xornadas desenvolveranse na Fundación Laxeiro, os días 4, 5 e 6 de novembro, en horario de 19 a 21 horas e a inscrición é gratuíta. O público destinatario son creadoras e creadores en xeral, estudantes e profesorado de todos os ámbitos artísticos, programadores e xestores culturais e público en xeral, interesado na arte ou no xénero. Están dirixidas por Dolores Ruiz, especialista en cuestións de xénero e políticas de igualdade. Dolores Ruiz é máster cum laude en Xénero, Educación, Políticas de Igualdade e Liderazgo por a Universidade de Vigo; especialista en auditorías de igualdade de mulleres e homes por a Universidade Jaume I de Castelló; licenciada en Filoloxía Hispánica por a UNED e diplomada en Estudos Avanzados dentro do programa de doutoramento Literatura española e Teoría da literatura por a Universidade de Vigo.

Dolores Ruiz ten unha ampla experiencia no desenvolvemento de cursos, talleres e xornadas sobre as relacións de xénero no mundo laboral, educativo e familiar, para diversas organizacións e na realización de diagnósticos e plans de igualdade de oportunidades para diferentes organizacións empresariais galegas.

As xornadas están organizadas dentro das actuacións que a Unidade de Igualdade da Universidade de Vigo leva a cabo de xeito transversal en diferentes ámbitos sociais e, nesta ocasión, inscríbense dentro das actividades da Facultade de Belas Artes de Pontevedra, cuxo coordinador é o profesor titular desta facultade e artista, Ignacio Pérez-Jofre Santesmases.

A matrícula é totalmente gratuíta e farase por rigorosa orde de inscrición. As prazas son limitadas.

Para participar, as persoas interesadas, deben poñerse en contacto coa Fundación Laxeiro no teléfono: 986-43 84 75 ou no correo electrónico fundacion@laxeiro.es.