“Arraianos” reflexiona na súa nova etapa

Medio cento de colaboradores participan neste número, entre os que se atopan Pedro de Llano, Augusto Pérez Alberti, Marcial Gondar, Francisco Sineiro, Plácido Lizancos, Xosé Manuel Pereiro, Anxo Angueira e J.J.Moralejo. Aborda a realidade das aldeas galegas e as fondas transformacións polo abandono do ámbito rural, a que se víu sometido no último cuarto de século e que continúa na actualidade: ‘Convócase ao lector a reflexionar sobre a situación de desamparo das aldeas galegas, ao tempo que facemos un chamamento á clase política para que tome medidas reparadoras’, afirmou o editor Henrique Alvarellos.

Esta edición incorpora novidades, xa que a editorial Alvarellos asume a súa producción, tras ter asinado un acordo coa asociación Arraianos, promotora da mesma A estreada faciana de ‘Arraianos’ presenta unha nova maquetación de 158 páxinas editadas a toda cor e cun amplo despregue gráfico, que inclúe a presenza do fotógrafo vigués Manuel Cendón coa imaxe da cuberta e reproduccións no interior, pertencentes á mostra ‘Casas doentes’, que se expuso na Casa das Artes.

‘É unha revista galega, feita en galego. Conta con artigos en portugués respostando á filosofía de ‘Arraianos’, que xorde na Limia, que defende a desaparición das fronteiras entre Galicia e Portugal. O noso obxectivo é sacar dous números ao ano’, afirmou Alvarellos. Distribuirase por toda Galicia, e porase á venda baixo demanda en España e no Norte de Portugal.