Aparece unha primeira edición inédita de Cantares Gallegos

Inclúe unha fotografía descoñecida de Rosalía, un autógrafo e unha carta dirixida á poetisa

O mundo rosaliano está revolucionado. Apareceu unha primeira edición de Cantares Gallegos moi especial. Anxo Angueira, presidente da Casa Museo de Rosalía de Castro, presentou onte ante os medios a nova adquisición da Fundación coa financiación da Barrié. Angueira non ocultaba a súa satisfacción: É un día moi feliz, unha gran xornada, porque ésta é unha xoia que engade luz sobre o estudo da repercusión que a obra de Rosalía tivo nos seus contemporáneos.

Anxo Angueira, presidente da Casa Museo, mostra o exemplar descuberto en Vigo.

A importancia do libro radica en que foi modificado polo seu primeiro propietario, Ramón Segade, que incorporou unha fotografía descoñecida de Rosalía feita por María Cardarelly, un poema autografado pola autora e que é o único que se conserva coa súa letra, e un manuscrito de Segade onde reproduce a resposta da poetisa Fernán Caballero ao exemplar adicado.

A descuberta e a compra do exemplar tivo lugar na contorna da exposición No principio foi o verso que se mostra na sede viguesa da Barrié polos 150 anos da publicación de Cantares Gallegos e que da, di Angueira, proba da repercusión social que está a ter. Un veciño da cidade (quen prefire permanecer no anonimato) púxose en contacto coa Casa Museo para ofrecer un exemplar tras visitar a mostra. O coste da adquisición, moi razoable por Angueira, tampouco trascendeu.

O exemplar amosarase en Vigo ata o 15 de septembro e logo irá á Casa Museo en Padrón.

Contenido patrocinado