Ao Parlamento por Reboiras

 “Xosé Ramón Reboiras Noia foi un estudante brillante de Enxeñería, formado na intelectualidade galeguista de Vigo, que nunha situación política anómala, por conciencia, vese impulsado a implicarse en organizacións clandestinas”. Así, a familia de Moncho Reboiras recollía a súa “enérxica contrariedade e indignación” ante a proposición do Partido Popular na que insta ao Parlamento a retirar os monumentos de Santiago, Lugo e Arzúa en lembranza do veciño vigués, asasinado nunha persecución franquista, tildándoo de terrorista. “Foi declarado vítima do franquismo en 2009”, sinalou o seu irmán, Manolo Reboiras, quen coa súa filla, Sara, reuníronse co presidente do Parlamento, Miguel Anxo Santalices, para entregarlle un comunicado e solicitar a paralización desa proposición popular.

“A reunión foi amena, sociable e diplomática, tal e como é Santalices, un home de boa fe. Quedou en facer as xestións pertinentes no Parlamento, xa que é sensible coa loita pola memoria, aínda que no seu partido tamén hai quen ten outras afinidades”.