Antonio Durán ‘Morris’, nomeado premio Xiria á labor teatral

A Mostra Internacional de Teatro Cómico e Festivo de Cangas (MITCFC) acordou conceder o Premio Xiria ao Mellor Labor Teatral 2026 ao actor vigués Antonio Durán ‘Morris’ (1959), en recoñecemento a unha ampla e sólida traxectoria profesional que abrangue case cinco décadas sobre os escenarios e nas pantallas.

A organización destacou a súa versatilidade interpretativa, así como unha “capacidade creativa excepcional” que lle permite dar vida tanto a personaxes cómicos como dramáticos, conectando con públicos moi diversos. Segundo a MITCFC, Morris é hoxe un referente indiscutible dentro do panorama escénico galego.

O actor recibiu a noticia con “alegría tremenda”, especialmente por tratarse dun recoñecemento procedente de persoas coas que comparte oficio e traxectoria. Ademais, quixo subliñar o carácter colectivo do premio, que considera extensible a todas aquelas persoas que formaron parte do seu camiño profesional, incluíndo tanto as que xa non están como as que continúan a traballar nun sector que cualificou de esixente. A entrega do galardón terá lugar o vindeiro 4 de xullo, ás 22 horas, no Auditorio Municipal de Cangas, no marco da celebración da Mostra.

Morris foi unha figura clave na modernización do teatro galego, como cofundador da compañía Artello en 1978 e participante na creación do Centro Dramático Galego en 1984. Ao longo da súa carreira interveu en máis dun cento de producións audiovisuais.