Ángel Carracedo: 'Case todos os casos máis famosos de cada país, se son complicados, remataron no noso laboratorio'

Carracedo impartiu na Facultade de Ciencias da Universidade de Vigo a conferencia 'CSI made in Galicia' na que abordou a 'revolución que supuxo a xenómica na medicina' pasando dunha situación inicial na que 'non se podía axudar demasiado aos xuíces nos problemas forenses' a un contexto no que 'se pode obter un perfil de ADN de calquera cousa, por pequena que sexa, mesmo unha mostra de contacto'. Non obstante precisou que, malia o título do relatorio, a vida real 'non é CSI' e non se poden lograr resultados 'nunha hora'.

En canto aos casos nos que o laboratorio galego traballou, destacou o crime das nenas de Alcàsser, o 11-M, onde se logrou identificar o ADN dunha persoa que foi posteriormente detida -ao descartarse que as mostras fosen dos terroristas que se suicidaran-; a Operación Minstead, no Reino Unido, que permitiu condenar a un home ao que se atribúen máis de 80 agresións sexuais -sendo o caso de violador en serie máis importante de Europa-; ou as probas do fillo de Clara Rojas, que apareceu estando ela secuestrada polas FARC.

Outros casos nos que traballou foi o 11-S, onde había 'mostras moi degradadas' que igualmente puideron ser obxecto de análise, e un crime parecido ao de Alcàsser, pero acontecido na localidade norueguesa de Kristiansand. As probas desenvolvidas neste caso lograron que se procesase dúas persoas que foron declaradas culpables do asasinato unhas nenas.

Lonxe do ámbito criminal, tamén traballou na análise de posibles restos de Cristóbal Colón, ou en cadáveres de vítimas do tsunami que azoutou Asia hai uns anos.

Outras das aplicacións desta disciplina, segundo explicou, pasan polas probas de paternidade, mesmo de persoas falecidas -nestes casos con motivo de herdanzas-. Neste sentido, explicou que os centros oficiais, como é o caso do de Santiago, non desenvolven estas probas se se solicitan ás agachadas da nai -algo que é legal en España aínda que, a xuízo de Carracedo, non é 'ético' por invadir a intimidade da muller-.

KOSOVO

En canto a próximas tarefas, explicou que o próximo ano traballarán con vítimas da guerra de Kosovo, cuestión á que se dedicarán varios laboratorios europeos, e entre eles o de Santiago.

Ao respecto, referiuse ás diferenzas culturais que existen en diferentes países, recordando que mentres en lugares como Arxentina e Chile as familias querían identificar os seus achegados asasinados canto antes, no caso de Kosovo ao principio ' preferían vivir esperanzados pensando que o familiar estaría vivo nun cárcere de Serbia que pensar que estaba morto' se ben, co paso dos anos, finalmente decidiron que queren que os corpos sexan identificados.

RECURSOS HUMANOS

Ao respecto da alta produción científica realizada dende o Instituto de Medicina Legal de Santiago, e que é o motivo de que lles sexan remitidos casos de grande cantidade de países, Carracedo afirma que 'o que parece incrible é que se poida ter esa produción científica coa inversión que se fai en investigación'. Así, atribuíu o éxito a que 'no grupo hai xente extraordinaria'.

En todo caso, Ángel Carracedo considerou, na súa alocución, necesario facer 'un esforzo importante' en recursos humanos para a investigación.

Sobre os retos de futuro para a medicina forense, asegurou que 'queda un mundo de cousas por facer', como mellorar o coñecemento da orixe xeográfica ou os trazos físicos das persoas a través do seu ADN, entre outras cuestións.