O actor vigués Antonio Durán 'Morris' presentará a gala dos Premios Feroz 2026

O actor vigués Antonio Durán 'Morris' é o segundo presentador anunciado dos Premios Feroz 2026, que se celebrarán o 24 de xaneiro en Pontevedra. Este luns pola tarde deuse a coñecer a noticia nun acto no Teatro Principal de Pontevedra. O actor sorprendeu coa súa aparición ao público pontevedrés co que mantivo a continuación un coloquio.

Morris atesoura unha longa experiencia en teatro e é un dos rostros máis coñecidos das producións audiovisuais galegas desde que comezase a súa andaina en series como ‘Pratos combinados’ e ‘Pai Casares’. Presentou diversos programas da TVG e alcanzou gran popularidade a nivel estatal polas súas colaboracións en series como ‘Los Serrano’, ‘Los hombres de Paco’, ‘Hospital Central, ‘El comisario’, ‘El Ministerio del Tiempo’, ‘Con el culo al aire’… ata chegar á exitosa ‘Fariña’ e o seu papel de Charlín polo que recibiu en 2019 o Premio Feroz a mellor actor de repartición dunha serie, así como o Premio de la Unión de Actores. ‘Néboa’ para TVE, ‘Alta Mar’ para Netflix e ‘30 monedas’ para HBO foron os seus últimos títulos audiovisuais, que compaxina cun prestixioso traballo en teatro.

Xunto á xa anunciada Samantha Hudson, Morris será un dos catro presentadores e presentadoras que conducirán a gala dos Feroz 2026. Os dous nomes que quedan por coñecerse iranse revelando ao longo das próximas semanas. A Asociación de Informadores Cinematográficos de España (AICE) celebrará os Feroz por segundo ano consecutivo en Pontevedra, o sábado 24 de xaneiro no Pazo da Cultura.

A entrega de premios virá precedida dunha ampla programación de actividades que comezarán no mes de outubro e que volverán convocar na Boa Vila a numerosas personalidades do audiovisual español. Os Premios Feroz destacan o mellor da produción audiovisual española do ano para a prensa especializada.