O 75 º cabodano de Castelao comeza en Vigo

O IES Castelao, en pleno barrio do Calvario, é o único centro de educación secundaria de Galicia que leva o nome do celebérrimo escritor e político de Rianxo do que neste 2025 está a celebrarse o seu 75º cabodano. “Non podíamos perder a oportunidade de sumarnos a esta celebración”, sinala o seu director, Cándido Paniagua, que onte presidiu a presentación do programa de actividades en memoria de Alfonso Daniel Rodríguez Castelao, nas que estará implicado todo o alumnado do instituto.

Este acto inaugural contou coa participación de representantes de todo o sector cultural da cidade, ademais de autoridades como o alcalde Abel Caballero, a vicepresidenta da Deputación Luisa Sánchez, a delegada da Xunta en Vigo Ana Ortiz ou o reitor da UVigo Manuel Reigosa, entre outros. Nel participaron os alumnos de 4º da ESO do IES Castelao, que interpretaron varias pezas de folclore galego e fixeron unha pequena representación teatral dun extracto dunha das obras máis famosas do escritor de Rianxo, “Os vellos non deben namorarse”.

A dirección do instituto convidou para esta inauguración a Sara Alonso, exdirectora do centro e catedrática de Lingua Española; Marilar Aleixandre, tamén exdirectora e principal impulsora do cambio de nome do instituto para homenaxer a Castelao; e Miguel Anxo Seixas, presidente da Fundación Castelao, que protagonizaron un coloquio sobre a figura do escritor.

A de onte foi a primeira das 13 actividades programadas ao longo do ano con alumnado do instituto que comprenderán saídas didácticas, conferencias e un concurso literario.