Redondela aproba unha tasa dun euro aos peregrinos

Redondela aprobou unha taxa turística de un euro por noite nunha moción, presentada por AER, que saíu adiante ao contar co voto a favor de PSOE e BNG. Estima que se poderían recadar máis de 160.000 euros anuais atendendo ao número de visitantes, principalmente peregrinos, que pernoctan en Redondela. Os populares votaron en contra e acusaron ao goberno de cargar contra o turismo e contra os autonómos que viven deste sector co único obxectivo de recadar. A aplicación da taxa queda pendente da aprobación dunha ordenanza que a regule polo que as pretensións da Agrupación de Electores de comezar a aplicala en dous meses non parece factible.

A moción presentada por AER argumentaba que a aplicación dunha taxa ás estancias turísticas que gravará a pernocta en todo tipo de aloxamentos hotelerios, incluídos os apartamentos ou as vivendas turísticas, sería beneficiosa a nivel medioambiental e económico. O edil de AER explicaba que dado o incremento notable de turismo, nomeadamente peregrinos que pasan pola vila e que se estiman son máis de 160.000 ao ano sería lóxico valorar a aplicación dunha taxa cuxa recadacións serviría para sufragar investimentos e gastos que teñen que ver co turismo sostible. Unha taxa que apuntan podería ser de 1 euro por noite “que non vai desanimar a ninguén a vir a Redondela pero si vai supoñer un ingreso importante para as arcas municipais”. Apuntaba o edil que esta taxa viría compensar o uso que as 500 persoas que cada día pasan por Redondela fan das infraestruturas municipais. “Un euro ao día non vai desincentivar practicamente a ningún peregrino e, pola contra, ao Concello vaille permitir uns ingresos dunha dimensión considerable”, concluía Roberto Villar. O debate serviu tamén para falar dos “efectos perniciosos que o incremento de turistas está a ter no mercado da vivenda”. O edil do BNG , Xoán Carlos González, defendeu a proposta ante un incremento notable do número de peregrinos, pero tamén cualificou de precipitado pretender que entre en vigor no prazo de tres meses.