A rapazada de Redondela aprende sobre primeiros auxilios

A rapazada que participa nos campamentos de Conciliación de Verán, organizados polo Concello de Redondela, están a recibir sesións de primeiros auxilios. Trátase dun curso con nocións básicas para que todos os pequenos poidan actuar en caso de emerxencia. Coñecer o número de teléfono 112, técnicas a utilizar ante un caso de afogamento ou facer unha reanimación cardiopulmonar son algunhas das cuestións que están a aprender neste pequeno curso municipal.

Máis de 300 os nenos dos diferentes campamentos municipais xa recibiron esta formación da man da concelleira de Infancia, Pilar Martínez, médico de profesión, e do grupo de Voluntariado do Concello de Redondela. Desde unha idade temperá a rapazada pode aprender primeiros auxilios básicos “e os primeiros minutos son cruciais en caso de emerxencia”, sinalou Martínez. A alcaldesa, Digna Rivas, visitou onte o curso que se impartiu no campamento do CEIP Alexandre Bóveda, xunto coa concelleira de Servizos Sociais, Iria Vilaboa. A rexedora salientou a importancia da dar esta formación aos máis pequenos “porque en calquera momento con saber unha cuestión tan básica como o número de emerxencias 112 poden salvar unha vida”.

Entre os meses de xullo e agosto son preto de 500 rapaces os que participan no Programa Municipal de Conciliación para o Verán en diferentes quendas.