As embarcacións da Liga Galega de Traiñeiras estarán en Chapela

O paseo de Cardona, en Chapela, recibe mañá a todas as embarcacións da Liga Galega de Traiñeiras: a LGT-A, a LGT-B e a LGT Feminina. En total, 25 traiñeiras e uns 450 remeiros daranse cita en augas de Arealonga. Onte celebrouse a presentación da novena edición da Bandeira Feminina Concello de Redondela da Liga F e a quinta edición da Bandeira Chapela Concello de Redondela da Liga A, organizadas polo Club de Remo Chapela coa colaboración do Concello, ás que hai que engadir a Bandeira Chapela Wofco da Liga B.

A alcaldesa, Digna Rivas, sinalou que “é un privilexio contar con todos os clubs de Galicia no paseo de Cardona”. Chapela converterase mañá na capital do remo galego, despois de que a fin de semana pasada fose o club de Cesantes o encargado de organizar as probas da LGT-A e a LGT-F en augas da enseada de San Simón. O concelleiro de Deportes, Iván Valles, salientou tamén que Redondela é “o único municipio de Galicia que compite en todas as categorías da liga Galega de Traiñeiras, e o que conta con máis embarcacións, cun total de 5 traiñeiras”. O presidente do CR Chapela, Antonio Viaño, explicou que esta tripla cita será un feito “excepcional”. O club de Chapela participará nas tres ligas logo de inscribirse na LGT-B cun segundo barco.

A competición comezará ás 16:30 horas coa regata da LGT-B na que participarán CR Puebla, CR Cedeira, CM Bueu-Simei, CRN Riveira, CR Salgado-Perillo e os anfitrións do CR Chapela-Wofco. Ás 17:00 comezará a Bandeira Feminina Concello de Redondela da LGT-F coas anfitrioas do CR Chapela-Wofco que lideran a liga seguidas da outra embarcación local, do CCD Cesantes-Amegrove-Cefycal, máis os barcos de CR Rianxo, CR Cabo da Cruz, Mugardos, A Cabana Ferrol, CM Castropol e CR Salgado-Perillo. A última das probas será ás 17:30 coa Bandeira Chapela Concello de Redondela da LGT-A na que participan CR Ares, SD Tirán-Pereira, CM Castropol, CR Rianxo, SD Samertolameu-Oversea, CR Urme, CR Mecos, CR Narón, CR Cabo da Cruz, Mugardos-A Cabana Ferrol e as traiñeiras locais do CCD Cesantes-Rodavigo e a anfitrioa CR Chapela-Wofco.

Os participantes terán un percorrido de tres millas náuticas con catro longos. Entre as tres bandeiras repartiranse 19.000 euros en premios, con 4.000 á Bandeira Chapela Wofco da Liga B, 6.000 na Bandeira Feminina Concello de Redondela da Liga F e 9.000 na Bandeira Chapela Concello de Redondela da Liga A.