O BNG bota o resto en Soutomaior pola Alcaldía

A portavoz do BNG, Ana Pontón, dixo que ve alcalde ao candidato en Soutomaior, Manuel Lourenzo, a quen definiu como unha persoa que leva ao concello “na cabeza e no corazón”. No acto, destacou o seu convencemento de que Soutomaior terá alcalde do BNG a partir do 28 de maio. “Estamos na conta atrás para abrir un tempo novo en Soutomaior, de ilusión, de esperanza, de futuro, a conta atrás para facer historia con Manuel Lourenzo como próximo alcalde deste concello”, proclamou. Enfrente ten a Agustín Reguera, decano dos alcaldes da provincia, de novo polo PP, que busca a maioría absoluta.

A líder do Bloque dixo do candidato que xa demostrou como defende os intereses do concello e da veciñanza ao longo destes anos no Parlamento, “dándolle voz ás vosas demandas en todos os temas importantes: sanidade, educación, equipamentos, infraestruturas, sempre desde a razón e desde o corazón, e esa defensa continuará multiplicada cando tras o 28 de maio sexa o voso próximo alcalde”, alegou. “Manu, interpelou Pontón, sei que serás o mellor alcalde que pode ter Soutomaior, porque sei do teu amor por este concello que coñeces como a palma da man, sei que vas dar o mellor de ti para construír un concello con mais futuro, con máis benestar, con máis oportunidade”, recalcou.

Pontón fixo fincapé no modelo municipal de éxito do BNG, que funciona: “Onde gobernamos transformamos en positivo, construímos concellos con calidade de vida, rentabilizamos cada euro, poñemos en marcha concellos participativos, feministas, que apostan pola igualdade, sustentables”.