Zona Franca impulsa un Centro de Negocios en Pontevedra

A construción dun futuro Centro de Negocios e Emprendemento en Pontevedra e o estudio de diferentes alternativas para a ampliación do chan empresarial na cidade foron os dous temas de fondo no encontro que mantiveron onte o delegado especial do Estado da Zona Franca de Vigo, David Regades, e o alcalde de Pontevedra, Miguel Anxo Fernández Lores.

Na reunión, celebrada na sede do Consorcio en Vigo, ambos os dous dirixentes, acompañados pola concelleira de Promoción Económica de Pontevedra, Anabel Gulías, e a directora de Proxectos de Zona Franca, Laura Rivas, afianzaron o obxectivo común de poñer en marcha un novo Centro de Negocios e Emprendemento, que se iniciará coa procura de posibles localizacións, proceso que levará a cabo no primeiro trimestre do ano 2026, segundo Regades.

Para a ubicación destas instalacións primarase o carácter urbano e céntrico, a fin de que estea integrado na dinámica empresarial e social da cidade, dando resposta á demanda actual. O plantexamento é que o novo Centro, que estaría ligado á Universidade de Vigo e as súas especializacións, poida destinarse a toda a cadea empresarial, dotado de espazos de incubación para que as ideas transfórmense en startups, poidan crecer, haxa aceleradoras para acompañalas no proceso de desenvolvemento, e instalacións tanto para a ubicación de empresas como áreas de networking.

O edificio, que tamén disporía de salas multiusos, xurdiría como un efecto tractor para a xeración de riqueza e impulso do emprego e seguiría o modelo de éxito que a Zona Franca leva anos traballando neste tipo de instalacións.

Tanto David Regades como Fernández Lores compartiron tamén o interese por abordar as posibilidades de ampliación do chan empresarial en Pontevedra. O delegado do Estado na Zona Franca e o alcalde mostráronse optimistas ao respecto e fixeron un repaso das dotacións existentes na cidade do Lérez confirmando que se fará un estudo das posibles alternativas susceptibles de ampliación para despois, unha vez ubicadas, aprobar un plan de viabilidade, así como o seu desenvolvemento.