Rueda destaca o potencial da provincia en eidos de innovación

O presidente do PPdeG, Alfonso Rueda, destacou onte na Xunta Directiva Provincial en Pontevedra que o feito de que Galicia poida aprobar ano a ano os seus orzamentos “en tempo e forma” constitúe “un sinal de identidade dun Goberno que, a diferenza doutros, si é quen de cumprir, planificar e garantir estabilidade á cidadanía”.

Rueda explicou que contar cunhas contas públicas aprobadas en prazo é o que permite ao Goberno galego poñer en marcha políticas que atendan necesidades como as da vivenda e que as cidades e vilas da provincia poidan incrementar así o seu parque público e contar con máis residencias a prezo asumible.

Nesta liña, o presidente autonómico afondou nunha folla de ruta encamiñada a reforzar os programas de vivenda pública e impulsar proxectos colaborativos cos concellos e vilas costeiras, así como a garantir que no rural tamén haxa vivenda digna dispoñible para fixar poboación e ofrecer oportunidades ás familias.

Alfonso Rueda tamén destacou o potencial de Pontevedra para converterse nunha provincia cun nicho propio no eido da innovación en sectores como a automoción, a biotecnoloxía mariña ou a investigación vitivinícola e agroalimentaria. No caso de Vigo, o presidente autonómico avoga por potenciar a relación entre a Universidade e o tecido empresarial en sectores como a automoción eléctrica e a Intelixencia Artificial aplicada á mobilidade, e para Pontevedra, a aposta do ente autonómico pasaría por impulsar un polo de innovación vencellado á economía creativa, ao deseño e ás novas tecnoloxías culturais e turísticas.

O líder do PP recordou as axudas postas en marcha para os afectados polos incendios da provincia.

Luis López: “Temos un partido preparado e disposto”

O presidente provincial do PP, Luis López, quixo poñer en valor que Alfonso Rueda “estivo ao pé de lumes e que agora está a pé das axudas”.

O líder provincial adiantou tamén que nas vindeiras datas celebraranse congresos locais do partido na provincia e dirixiuse aos seus asegurando que “todos e cada un dos que teñen responsabilidades no partido, teñen a indicación de poñerse á vosa disposición para axudarvos no que sexa preciso”. Nesta liña, López indicou que “estase vendo que o partido está preparado, ten iniciativa, fala do que lle interesa á xente, non cae nas trampas da oposición e sempre está disposto”.

Luís López deulle a benvida á Xunta Directiva a Belén Cachafeiro como alcaldesa de Forcarei subliñando que, tan só nuns meses, foi quen de facer que o seu Concello sexa hoxe unha administración “que paga as axudas e aproba os seus Orzamentos”.